លោក ហ្គ្រេន កាដុង (Grant Cardone) ត្រូវបានគេចាត់ទុកថា ជាអ្នកលក់មួយដ៏ឆ្នើមនៅក្នុងសតវត្សទី២១ ព្រោះគាត់ចំណាយពេលលក់អស់ជិតកន្លះជីវិតលោករហូតទាល់តែលោកក្លាយជាមហាសេដ្ឋីផងដែរ។ ដូចនេះហើយលោកក៏បានចែករំលែកនូវគន្លឹះដែលបានជួយឲ្យរូបលោកជោគជ័យដូចសព្វថ្ងៃនេះ។
ខាងក្រោមនេះ គឺជាយុទ្ធសាស្ត្រទាំង ៥យ៉ាង ដ៏ល្អរបស់លោក ហ្គ្រេន កាដុង៖
- គន្លឹះទី១ើ ត្រូវតម្រូវផ្នត់គំនិតផ្នែកហរិញ្ញវត្ថុរបស់អ្នក
ប្រសិនបើអ្នកចង់ក្លាយជាអ្នកលក់ដ៏ពូកែ ជាដំបូងអ្នកត្រូវតែមានផ្នត់គំនិតដែលចង់សេរីភាពបន្ថែមលើផ្នែកលុយកាក់ ពីព្រោះពេលដែលបុគ្គលមួយមិនមានប្រាក់គ្រប់គ្រាន់ ហើយមិនមានគំនិតចង់អភិវឌ្ឍន៍ស្ថានភាពហរិញ្ញវត្ថុខ្លួនទេ បុគ្គលនោះនឹងមានទំនោរគិតថា គេសប្បាយចិត្តនឹងអ្វីដែលមាន លុយច្រើនមិនអាចផ្តល់ភាពរីករាយបានទេ ឬគេគិតថាមានមនុស្សច្រើនទៀតដែលលំបាកជាងខ្លួន។ គំនិតទាំងនេះមិនអាច ជួយឲ្យអ្នកមានកម្លាំងចិត្តដើម្បីលក់អ្វីទៀតទេ ហេតុដូចនេះហើយ អ្នកត្រូវតែផ្លាស់ប្តូរផ្នត់គំនិតទាំងនេះជាមុនសិន។
- គន្លឹះទី២៖ ត្រូវតាមដាន ឬបន្តទាក់ទងអតិថិជន
បើយោងតាមសម្តីលោក Grant Cardone អ្នកលក់ត្រូវ ខល(call) ទៅអតិថិជនយ៉ាងហោចណាស់ពី ៥ ទៅ ៨ ដងទម្រាំតែលក់អ្វីមួយបាន តែអ្នកលក់មួយចំនួនមិនហ៊ានសូម្បីតែខលទៅអតិថិជនលើសពី២ដងនោះទេ។ អ្នកលក់គួរតែដឹងច្បាស់ថា អ្នកលក់អាចរកចំណូលបានគឺនៅក្នុងដំណាក់កាលនេះហើយ មិនមែនពេលនាំភ្ញៀវទៅមើល មិនមែនពេលបង្ហោះផលិតផលលើបណ្តាញសង្គមនោះទេ។ ដូចនេះ អ្នកត្រូវតែបន្តទាក់ទងអតិថិជនដែលមានចំណាប់អារម្មណ៍លើផលិតផលរបស់អ្នក។
- គន្លឹះទី៣៖ ត្រូវប្រើយុទ្ធសាស្រ្តចម្រុះនៅក្នុងការលក់
នៅក្នុងសង្គមបច្ចុប្បន្ននេះ ដើម្បីលក់បានជោគជ័យ អ្នកមិនអាចពឹងផ្អែកតែលើការលក់នៅកន្លែងផ្ទាល់ ឬការលក់តាមអិនធើណែត នោះទេ ពីព្រោះការដែលអ្នកប្រើយុទ្ធសាស្រ្តកាន់តែច្រើន នោះឱកាសក្នុងការលក់ផលិតផលរបស់អ្នកក៏កាន់តែធំផងដែរ។ បើយោងតាមប្រសាសន៍របស់លោក យុទ្ធសាស្ត្រក្នុងការលក់របស់លោកមានដូចជា ការលក់លើអិនធើណែត ការលក់នៅកន្លែងផ្ទាល់ ការលក់តាមបណ្តាញសង្គម ការលក់តាមការខលទូរស័ព្ទ និងការលក់តាមរយៈការណែនាំពីបណ្តាញសង្គមរបស់យើង ដែលពួកគេស្គាល់បុគ្គលដទៃដែលមានចំណាប់អារម្មណ៍លើផលិតផលរបស់យើង។
- គនឹ្លះទី៤៖ ត្រូវធ្វើឯកសារឡើងដើម្បីជាភស្តុតាងនៃការលក់របស់អ្នក
មិនថាអ្នកពូកែលក់យ៉ាងណាទេ ប្រសិនបើគ្មានក្រដាសស្នាមទេ នោះការខិតខំប្រឹងប្រែងរបស់អ្នកអាចក្លាយជាអសារបង់ ពីព្រោះអតិថិជនខ្លះ សន្យា ឬប្រាប់អ្នកថាគេនឹងទិញផលិតផលរបស់អ្នកហើយ តែពួកគេអាចបដិសេធបានព្រោះគ្មានអ្វីបញ្ជាក់ ក្រៅពីសម្តីដែលនិយាយហើយ។ ហេតុនេះហើយ អ្នកត្រូវតែត្រៀមឯកសារឲ្យរួចជាស្រេច ហើយមានការទទួលស្គាល់ពីអតិថិជនផ្ទាល់ ទើបអ្នកអាចបិទការលក់ដោយជោគជ័យជាស្ថាពរ។
- គន្លឹះទី៥៖ ត្រូវបន្តបន្ថែមចំណេះដឹងរបស់ខ្លួនក្នុងការលក់ជានិច្ច
មិនថាអ្នកជាអ្នកខ្លាំងក្នុងការលក់យ៉ាងណាទេ ប្រសិនបើអ្នកមិនព្រមទទួលយកចំណេះដឹងថ្មីៗទេ នោះថ្ងៃណាមួយ អ្នកនឹងត្រូវបាត់មុខពីសង្គមឬពីទីផ្សារដែលពេញទៅដោយការប្រកួតប្រជែងនេះ។ អ្នកសាកស្រមៃបន្តិចទៅមើល ប្រសិនបើអ្នកមិនចេះ ហើយក៏មិនព្រមប្រើបណ្តាញសង្គមដែលកំពុងត្រូវបានប្រើប្រាស់ក្នុងការលក់ទេ តើអ្នកលក់ទាន់អ្នកដែលគេប្រើទេ? ពេលដែលអ្នកបរាជ័យក្នុងការលក់លើកនេះ គិតមើលឡើងវិញថាហេតុអ្វីទើបបានជាមិនសម្រេច ហើយយើងគួរតែអ្វីយ៉ាងដូចម្តេចវិញទើបបានជោគជ័យ? ការខិតខំបន្ថែម និងបំពេញវិជ្ជាឲ្យខ្លួន នេះហើយដែលធ្វើឲ្យលោក Grant Cardone មានដូចសព្វថ្ងៃនេះ៕
អត្ថបទ៖ Alikato
