ការសិក្សាបានលទ្ធផលល្អ គឺទាមទាមឲ្យសិស្សានុសិស្សមានភាពឆ្លាតវៃដើម្បីអាចឈោងចាប់និន្ទេសល្អៗបាន (និន្ទេសខ្ពស់) ថ្ងៃនេះយើងខ្ញុំ សូមលើកយក គន្លឹះ ក៏ដូចជាវិធីសាស្ត្រងាយៗទាំង ៥យ៉ាងចែកជូនដល់អ្នកទាំងអស់គ្នា។
១. សិស្សពូកែ ត្រូវពូកែអាន
ការចាប់ផ្តើមអានរឿងផ្សេងៗ ប្រលោមលោក និងកំណាព្យអប់រំល្អៗ ដែលមាននៅក្នុងកម្មវិធីសិក្សា និងអានការសៀវភៅរឿងបរទេស រួចធ្វើការប្រៀបធៀបគ្នា។ អ្នកក៏អាចអានសៀវភៅវេយ្យាករណ៍ ជាពិសេសសៀវភៅណែនាំពីវិធីសាស្ត្រក្នុងការតែងនិពន្ធជាដើម។ ការអានទាំងនេះ ធ្វើឲ្យអ្នកមានភាពឆ្លាតវៃជាងមុន និងដឹងរឿងថ្មីៗច្រើន ពិសេសទទួលបានទិន្នន័យ និងព័ត៌មានបន្ថែមជាច្រើនទៀត។
២. បង្កើនប្រសិទ្ធភាពក្នុងការអានសៀវភៅ
ចំណាប់អារម្មណ៍ និងឆន្ទៈក្នុងការអានសៀវភៅពិតជាគន្លឹះសំខាន់ដើម្បីទទួលបាន ប្រសិទ្ធភាពខ្ពស់។ បន្ទាប់មក អ្នកត្រូវជ្រើសរើសប្រភេទសៀវភៅចូលចិត្ដ និងផ្ដល់អត្ថប្រយោជន៍ចំពោះរូបអ្នក។ ម្យ៉ាងវិញទៀត អ្នកត្រូវដឹងឲ្យច្បាស់ពីអ្វីដែលអ្នកកំពុងតែអាន។ ការអានច្រើន រួចត្រឹះរិះពិចារណានូវព័ត៌មានសំខាន់ និងពាក់ព័ន្ធ។ ការអានពីបញ្ហា ដែលកើតមានក្នុងជីវិតប្រចាំថ្ងៃតាមដំណើររឿងនីមួយៗ មកប្រៀបធៀបជាមួយជីវិតពិត អ្នកនឹងក្លាយជាមនុស្សម្នាក់ដែលចូលចិត្តអានជាពុំខាន។
៣. បង្កើនជំនឿចិត្ត
ដើម្បីកសាងជំនឿចិត្តលើខ្លួនឯង ជាដំបូងអ្នកត្រូវកំណត់ចំណាំ និងគិតពីលទ្ធផលវិជ្ជមានលើចំណុចខ្សោយរបស់អ្នក ហើយព្យាយាមនិយាយបញ្ហារបស់ខ្លួនប្រាប់ទៅមិត្តជិតដិត។ អ្នកចាប់ផ្ដើមកត់ត្រារាល់ទង្វើទទួលបានជោគជ័យ និងរីករាយចំពោះវាជានិច្ច។ បន្ទាប់មក ចូរចងចាំក្នុងចិត្តថា គ្មានអ្នកណាម្នាក់ល្អឥតខ្ចោះនោះទេ។ ដូច្នេះ អ្នកមិនចាំបាច់តក់ស្លុកចំពោះទង្វើខុសឆ្គងរបស់ខ្លួនឡើយ។
៤. ចេះកសាងមិត្តភាព
ការសិក្សារបស់អ្នក ប្រៀបដូចនឹងក្រុមការងារល្អមួយដែរ បើអ្នកមានមិត្តដែលពូកែ ហើយរៀនបាននិន្ទេសល្អ អ្នកគួរតែរៀនសូត្រពីពួកគេ ហើយសេពគប់ធ្វើជាមិត្ត ដើម្បីអាចផ្លាស់ប្តូរមតិយោបល់គ្នាទៅវិញទៅមក ហើយអ្នកនឹងចម្រើនចំណេះដឹងបន្ថែមកានត់ែច្រើន។
៥. អភិវឌ្ឍចំណេះដឹង
យើងជិះរថយន្ត មិនដែលមានអ្នកឈប់កណ្តាលទីដែលមិនទាន់ទៅដល់គោលដៅទេ។ ដូច្នោះយើងក៏ដូចគ្នា ត្រូវតែចេះអភិវឌ្ឍខ្លួនឲ្យបានជាប្រចាំជានិច្ច តាមរយៈការសិក្សាពីសាលារៀន និងតាមការអានសៀវភៅ ការស្រាវជ្រាវបន្ថែមដោយខ្លួនឯងទៀត ទើបអាចធ្វើឲ្យអ្នកកាន់តែពូកែ និងឆ្លាតវៃលើសអ្នកដទៃបាន។
ចូរប្រិយមិត្តអ្នកទាំងអស់គ្នាប្រឹងប្រែងស្រាវជ្រាវ អានសៀវភៅដោយខ្លួនឯងបន្ថែមឲ្យបានច្រើន ដើម្បីបំពេញចំណេះដឹងដែលអ្នកត្រូវការ និងចង់បាន បើពុំនោះទេការសិក្សារបស់អ្នកនឹងមិនទាន់គេទេ ព្រោះមិត្តភក្តិរបស់អ្នកពួកគេបានខំប្រឹងខ្លាំងជាងអ្នក និងដើរទៅមុនអ្នករួចហើយ៕
