ខុងជឺ ជាកវីដែលយើងខ្ញុំសុំអនុញ្ញាតដាក់ឈ្មោះថា “ខុងជឺ ទស្សនៈវិជ្ជាសាមញ្ញ” ជាសៀវភៅរៀបរៀងឡើងដោយ ហ្វាងស៊ូ អ្នកប្រាជ្ញចិនសម័យ វើយកុក ត្រូវជាកូនរបស់ ហ្វាងឡាង សេនាបតីយោធាសម័យព្រះចៅ ឆាវជុយសម័យសាមកុក ដែលអ្នកប្រវត្តិសាស្រ្តបានរិះគន់ថា គាត់សរសេរលម្អៀង ដើម្បីគាំទ្រគំនិតរបស់ខ្លួនក្នុងឋានៈជាក្រុមអ្នកកាន់អំណាចថ្មីសម្រាប់ប្រឆាំងនឹងទស្សនៈរបស់ជឹងស៊ាន អ្នកប្រាជ្ញក្នុងយុគសម័យតុងហាន់ ដែលជាតំណាងឲ្យក្រុមអ្នកកាន់អំណាចចាស់។ ប៉ុន្តែទោះជាយ៉ាងណាក៏សៀវភៅនេះត្រូវគេចាត់ទុកថា ជាសៀវភៅមួយក្នុងបណ្ដាសៀវភៅតែប៉ុន្មានក្បាលប៉ុណ្ណោះដែលអាចឆ្លុះបញ្ចាំងពីអត្តសញ្ញាណរបស់ខុងជឺ ក្នុងរូបភាពដែលមានភាពជាមនុស្សខ្លាំង
បំផុត។ ម៉្យាងទៀតវាក៏ឆ្លុះបញ្ចាំងឲ្យឃើញអត្តសញ្ញាណរបស់ខុងជឺក្នុងឧត្តមគតិរបស់បណ្ឌិតនិងប្រជាជនដែលមិនងាយកើតទុក្ខក្នុងសម័យទឹកដីច្របូកច្របល់ចលាចល ដោយអ្នកនិពន្ធរៀបរៀងសំនួនវោហារគួរឲ្យចាប់អារម្មណ៍មិនផ្ដោតខ្លាំងទៅលើតែទ្រឹស្ដីឬគម្ពីរដែលនាំឲ្យធុញទ្រាន់។
ក្រៅពីនេះ បើពិនិត្យទៅលើផ្នែកគ្រប់គ្រងមុខជំនួញ ឬអំពីការដឹកនាំបែបថ្មីវិញ គោលការណ៍ ទស្សនៈ វិធីអនុវត្ត គុណធម៌ និងការប្រព្រឹត្តរបស់ខុងជឺ ដែលសៀវភៅមួយក្បាលនេះបានលើកបង្ហាញ គឺសុទ្ធសឹងជាការបំភ្លឺឲ្យឃើញពីគំនិតប្រាជ្ញា ដែលអាចយកទៅប្រើក្នុងសភាពពិតនៃជីវិតបច្ចុប្បន្នបានយ៉ាងល្អ មិនហួសសម័យ ដែលផ្តល់ជាប្រយោជន៍ដល់អ្នកអាន ទាំងផ្នែកជីវិតការងារនិងជីវិតផ្ទាល់ខ្លួន រហូតដល់ការរៀបចំខ្លួនដើម្បីរុញច្រានសង្គមឲ្យមានសភាពស្ងប់សុខជានិរន្តរ៍ ដែលក្រុមបោះពុម្ពម៉ាញប៊ុក្សយើងខ្ញុំសង្ឃឹមថានឹងទទួលបានការគាំទ្រពីសំណាក់ប្រិយមិត្តអ្នកអានជាមិនខាន។
