ពេលជីវិតឆ្លងដល់ដំណាក់កាលមួយ ក៏មកដល់ចំណុចដែលត្រូវសម្រេចចិត្តរឿងសំខាន់មួយ…នោះគឺចំណុចដែលគួរត្រូវរៀបការនឹងនរណាម្នាក់ឬត្រូវជ្រើសរើសថាគួរតែនៅលីវតទៅទៀត។
ការដែលថាវាជារឿងសំខាន់ គឺព្រោះតែរឿងនេះថាមានសារៈសំខាន់ទៅលើជាងពាក់កណ្តាលនៃជីវិតរបស់យើងដែលនៅសល់។ មនុស្សយើងច្រើនតែរៀបអាពាហ៍ពិពាហ៍នៅអាយុ ២៥-៣៥ឆ្នាំ។ ដូច្នេះបើមានអាយុត្រឹម ១០០ឆ្នាំ យើងក៏នឹងមានពេលវេលានៅជាមួយគ្នាបន្ទាប់ពីរៀបការប្រមាណ ៦៥-៨០ឆ្នាំឯណោះ។
ហេតុនេះប្រសិនបើសុខចិត្តនៅលីវ យើងនឹងឯកោពេញមួយជីវិត ប៉ុន្តែបើជ្រើសរើសរៀបការ ហើយបានរៀបការជាមួយមនុស្សល្អ ចេះយល់ចិត្ត និងចេះជួយគ្នាទៅវិញទៅមកជីវិតក៏នឹងមានក្តីសុខ។ តែបើជ្រើសរើសមនុស្សខុសព្រោះមុនពេលរៀបការហាក់ដូចមានអារម្មណ៍ថាគេជាមនុស្សល្អ គួរតែអាចចុះសម្រុងគ្នាបានលុះក្រោយពីរៀបការអ្វីៗក៏ប្រែប្រួលបាតដៃជាខ្នងដៃ ជីវិតក៏ត្រូវរងទុក្ខលំបាក។
ចាស់ៗតែងដាស់តឿនក្មេងៗថា “ក្តីស្នេហាធ្វើឲ្យខ្វាក់ភ្នែក កុំទុំមុនស្រគាល សេះល្អនៅលើចម្ងាយផ្លូវមនុស្សល្អនៅលើពេលវេលា រើសកូនស្រីឲ្យមើលម៉ែ…” គឺសុទ្ធតែចង់បញ្ជាក់ឲ្យពិនិត្យពិច័យច្បាស់លាស់សិនមុននឹងរៀបអាពាហ៍ពិពាហ៍។
“ចោទឆ្លើយបញ្ហាដួងចិត្ត” ជាសៀវភៅដែលប្រមូលផ្តុំសំណួរចម្លើយអំពីក្តីស្នេហា ការជ្រើសរើសគូការរៀបអាពាហ៍ពិពាហ៍ បញ្ហាគ្រួសារ ការទប់ជ្រែងក្នុងជីវិតគូស្រករ ដែលអ្នកនិពន្ធទទួលបានពីការសន្ទនាសំណួរជាលិខិត ដែលយើងសង្ឃឹមថាមានប្រយោជន៍ដ៏ច្រើនចំពោះប្រិយមិត្តអ្នកអាន។
