ហេតុអ្វីត្រូវចាប់ផ្ដើមពីពាក្យថា “ហេតុអ្វី?”

សៀវភៅមួយក្បាលនេះនឹងនិយាយពីវិធីគិត វិធីធ្វើ និងការទំនាក់ទំនងរបស់មនុស្សមួយក្រុម ដែលអាចបង្កើតជាកម្លាំងជំរុញចិត្តទៅដល់មនុស្សនៅ ជុំវិញខ្លួន ទោះជាអ្នកខ្លះកើតមកព្រមជាមួយនឹងទេព្យកោសល្យខាងនេះក៏ដោយ តែក៏មិនមែនមានចំពោះអ្នកណាម្នាក់នោះទេ ព្រោះចំណេះទាំងនេះអាចកើតឡើងបានដូចគ្នា ដោយត្រឹមតែប្រើការព្យាយាមតែបន្តិចប៉ុណ្ណោះ បុគ្គល ឬអង្គភាពក៏អាចធ្វើឲ្យមនុស្សកើតកម្លាំងជំរុញចិត្តដែលនឹងនាំគំនិត និងចក្ខុវិស័យរបស់ពួកគេទៅអភិវឌ្ឍន៍តទៅបាន។ បើនិយាយឲ្យងាយ គឺ មនុស្សទាំងអស់អាចស្វែងយល់ដើម្បីក្លាយជាអ្នកដឹកនាំបាននោះឯង។

គោលបំណងរបស់សៀវភៅនេះ មិនមែនជាការចង្អុលបង្ហាញឲ្យឃើញថា អ្វីខ្លះដែលប្រើមិនបានផលនោះទេ តែដើម្បីបង្ហាញ និងធ្វើឲ្យអ្នកយល់ពីវិធីក្លាយជាអ្នកដឹកនាំដែលទទួលបានជោគជ័យទៅវិញទេ។ ខ្ញុំមិនបានតាំងចិត្តបដិសេធនឹងគំនិតរបស់អ្នកផ្សេងនោះទេ ព្រោះភាគច្រើនសុទ្ធតែមានភ័ស្ដុតាងគាំទ្រដែលអាចស្ដាប់បានទាំងអស់ តែបញ្ហាគឺ ប្រសិនបើយើងចាប់ផ្ដើមពីសំណួរដែលខុស សូម្បីតែចម្លើយដែលត្រឹមត្រូវក៏អាចនាំយើងឲ្យឆ្ពោះទៅរកផ្លូវខុសបានដូចគ្នា…ហើយចុងក្រោយការពិតនឹងបង្ហាញ។ អ្វីដែលអ្នកនឹងបានអាននៅក្នុងសៀវភៅនេះ ជារឿងរ៉ាវរបស់បុគ្គល និងអង្គភាពដែលចាប់ផ្ដើមពីសំណួរដែលត្រឹមត្រូវ ពួកគេសុទ្ធតែចាប់ផ្ដើមដោយការសួរថា «ហេតុអ្វី»។