អ្វីដែលមនុស្សយើងមានក្តីប្រាថ្នាដូចៗគ្នា នោះគឺការប្រាថ្នាឱ្យខ្លួនឯងមានសេចក្តីសុខ។ ហេតុដូច្នេះហើយ ទើបមនុស្សគ្រប់គ្នាខិតខំស្វះស្វែង ដើម្បីឱ្យខ្លួនឯងបាននូវសេចក្តីសុខគ្រប់ពេលវេលា ដែលនាំឱ្យមនុស្សជាច្រើនបែកគំនិតខាងហិរញ្ញវត្ថុ និងភាពជោគជ័យតាមបែបអាណាចក្រ ដែលជាសេចក្តីសុខនិងភាពសមតាមបំណងប្រាថ្នានូវអ្វីដែលខ្លួនបានតាំងចិត្តទុក។
មានមនុស្សជាច្រើនយល់ថា ដើម្បីទទួលបាននូវសេចក្ដីសុខ លុះត្រាតែបំពេញនូវតម្រូវការតាមរយៈអាការៈខាងក្រៅគឺ ភ្នែក ត្រចៀក ច្រមុះ អណ្តាត កាយ ចិត្ត។ ហេតុដូច្នេះហើយ បានជាឃើញមនុស្សម្នាក់ៗ ប្រើវិធីជាច្រើនរូបភាពផ្សេងៗគ្នា ដើម្បីទទួលបាននូវសេចក្ដីសុខ ដូចជា អ្នកខ្លះទៅដើរលេងតាមទីកន្លែងផ្សេងៗ ខ្លះទៅមើលភាពយន្ត ខ្លះស្តាប់បទចម្រៀង ខ្លះទៅចូលក្លិបឬរង្គសាល ដើម្បីជួបជុំមិត្តភក្ដិ ផឹកស្រា លេងល្បែង ឬខ្លះសូម្បីតែការសេពគ្រឿងញៀនក៏នាំគ្នាធ្វើដែរទាំងដែលដឹងថា អ្វីទាំងអស់នោះមានខ្លះល្អនិងខ្លះមិនល្អ។ ប៉ុន្ដែគេយល់ត្រឹមតែថា អ្វីៗដែលធ្វើគឺដើម្បីបានសេចក្តីសុខដោយគេមិនបានយល់ថា វាគ្រាន់តែជាសេចក្ដីសុខបែបផ្លូវលោកតែមួយផ្នែកប៉ុណ្ណោះ។
វាគ្រាន់តែជាសេចក្តីសុខផ្នែកខាងក្រៅ ដែលបានទទួលការតបស្នងតាមផ្នែកឥន្រ្ទិយទាំង ៦ មាន ភ្នែក ត្រចៀក ច្រមុះ អណ្តាត កាយ ចិត្ត តែប៉ុណ្ណោះ។ ចំណែឯសេចក្តីសុខពិតប្រាកដ នឹងធ្វើឱ្យអ្នកមានសេចក្តីសុខគ្រប់ពេលវេលា។
