បញ្ចូលថាមពលឱ្យជីវិតអ្នកសាជាថ្មី

សៀវភៅនេះប្រសូតចេញពីកាលដែលខ្ញុំនៅបំពេញការងារនៅវិទ្យុនៅឡើយ កាលនោះប្រហែលជា៩ឆ្នាំមុន ខ្ញុំជាអ្នកចូលចិត្តអានសៀវភៅ យ៉ាងខ្លាំង ហើយកាលនោះខ្ញុំមិនទាន់ចេញជាសៀវភៅផ្ទាល់ខ្លួននៅឡើយទេ ខ្ញុំតែងតែអានសៀវភៅជានិច្ច ជាពិសេសសៀវភៅទាក់ទងនឹងបរមគ្រូ ទាំង៣ ហើយយកគំនិតល្អៗទៅនិយាយក្នុងវិទ្យុ ជាលទ្ធផលមានការគាំទ្រនូវគំនិតខ្ញុំយ៉ាងច្រើន ទើបខ្ញុំព្យាយាមបកប្រែសៀវភៅរបស់ពួកលោកនៅពេលទំនេរដើម្បីយកទៅនិយាយ គឺមិនមែនដើម្បីធ្វើជាសៀវភៅបោះពុម្ពផ្សាយទេ។ កាលនោះខ្ញុំបានព្យាយាមអភិវឌ្ឍចំណេះដឹងផ្នែកចិត្តវិទ្យាយ៉ាងខ្លាំងក្លា ដើម្បីឱ្យដឹងកាន់តែច្បាស់លាស់និងត្រឹមត្រូវទាក់ទងនឹងគោលការណ៍ នៃជោគជ័យទាំងឡាយផ្សារភ្ជាប់ជាមួយចិត្តវិទ្យា។