«តើទស្សនាទានជាអ្វី?» «តើត្រូវគិតបែបទស្សនាទានដូចម្ដេច?»
សំណួរទាំងពីរនេះ…តែងតែមានមនុស្សជាច្រើនបានសួរខ្ញុំ គឺច្រើនជាងការគិតក្នុងទស្សនៈដទៃទៀតដែលខ្ញុំបានលើកឡើង។ ឯមិត្តអ្នកអានក៏អាចជាមនុស្សម្នាក់ដែលមានសំណួរនេះក្នុងចិត្តដែរ។ ចម្លើយនឹងបរិយាយនៅក្នុងសៀវភៅនេះយ៉ាងលម្អិត។ នៅទីនេះខ្ញុំសូមប្រាប់ពីកម្លាំងជំរុញចិត្តក្នុងការធ្វើសៀវភៅមួយនេះ ព្រមទាំងមានចម្លើយខ្លីៗសម្រាប់សំណួរដែលមានក្នុងចិត្តរបស់មិត្តអ្នកអាន ដោយបូកបន្ថែមនូវសំណួរមួយទៀត នោះគឺ «ហេតុអ្វីបានជាមិត្តអ្នកអានចាំបាច់ត្រូវអានសៀវភៅមួយក្បាលនេះ?»។ ទស្សនាទានជាការប្រកាន់យកនូវការយល់ឃើញចំពោះរឿងណាមួយ។ នៅពេលយើងគិតដល់ទស្សនាទានដែលមានចំពោះរឿងផ្សេងៗ យើងអាចប្រើពាក្យជំនួសថា គំនិត ការគិត ការយល់ឃើញ ទស្សនៈ ឬអាចប្រើភាសាអង់គ្លេសថា Concept។ ទស្សនាទានមានចំណែកសំខាន់ក្នុងការតាក់តែងជីវិតរបស់មនុស្សម្នាក់ៗឱ្យខុសៗគ្នាទៅតាមវិថីជីវិតរបស់ខ្លួន។ មនុស្សម្នាក់ៗមានគំនិតទស្សនាទានលើរឿងណាមួយនោះត្រូវអាស្រ័យលើពលចំពោះការបង្កើតរូបរាងទស្សនៈដែលទាក់ទងនឹងរឿងទាំងនោះ។ ទស្សនាទានរបស់យើងមានដែនកំណត់ អាចកំណត់ដោយបទពិសោធ ចំណេះដឹង និងបរិបទជុំវិញដែលខុសគ្នា។ ហេតុនេះហើយ នៅពេលយើងជួបទស្សនាទានលើរឿងខ្លះរបស់អ្នកដទៃ ពេលខ្លះមិនអាចឱ្យនិយមន័យទស្សនា-ទានដែលខុសគ្នាបានទេ ឬអាចធ្វើឱ្យយើងវិនិច្ឆ័យ ឬក៏ដោះស្រាយបញ្ហាដែលកើតឡើងខុសភ្លាត់ ទើបចាំបាច់បំផុតដែលយើងត្រូវយល់ដឹងពីវិធីនៃការគិតបែបទស្សនាទាន។ សៀវភៅការគិតបែបទស្សនាទាន មួយក្បាលនេះ ជាសៀវភៅមួយក្នុងចំណោមសៀវភៅឈុត «គំនិតឈ្នះទាំង១០» ដែលមានបំណងដើម្បីឱ្យគ្រប់គ្នាមានសមត្ថភាពក្នុងការផ្សារភ្ជាប់នូវទិន្នន័យទាំងអស់ ដែលទាក់ទងនឹងរឿងណាមួយបានដោយមិនមានការប្រឆាំងគ្នា ដើម្បីបង្កើតគំនិតរួមដែលទាក់ទងនឹងរឿងនោះ ដោយជួយពន្យារមិនឱ្យសម្រេចរឿងអ្វីមួយតាមក្របខណ្ឌនៃគំនិតទស្សនាទានរបស់យើង ដែលកំណត់ឡើងដោយបទពិសោធ និងជួយឱ្យយើងវែកញែក ឬជ្រើសរើស «ខ្លឹម» ចេញពី «សំបក» ឬក៏អង្គប្រកបដែលមិនមែនជាប្រយោជន៍របស់រឿងនោះបាន។ អត្ថន័យនៅក្នុងសៀវភៅនេះ នឹងនាំមិត្តអ្នកអានឱ្យយល់ពីទស្សនាទាន យល់ពីការគិតបែបទស្សនាទាន និងការបដិបត្តិផ្សេងៗដើម្បីអភិវឌ្ឍជំនាញឱ្យ អាចគិតបែបទស្សនាទានក្នុងជីវិតប្រចាំថ្ងៃបាន ថែមទាំងអភិវឌ្ឍនិស្ស័យឱ្យ ក្លាយជាអ្នកគិតបែបទស្សនាទានក្នុងវិថីជីវិតប្រចាំថ្ងៃ។ ការអភិវឌ្ឍសមត្ថភាពក្នុងការគិតបែបទស្សនាទាន ក្រៅពីជួយឱ្យអាចយល់ពីទស្សនាទាន ដែលមានចំពោះរឿងផ្សេងៗជាច្រើនក្នុងការចងចាំរបស់យើងហើយ នៅជួយឱ្យយើងអាចសន្និដ្ឋានបានយ៉ាងសមហេតុសមផល អាចយកទៅប្រើ ដើម្បីឱ្យយល់ពីពិភពលោកជុំវិញបានយ៉ាងឆាប់រហ័ស ហើយជួយឱ្យអាចកំណត់និយមន័យ និងវិនិច្ឆ័យរឿងដែលដឹងបានយ៉ាងត្រឹមត្រូវនិងសមហេតុផលទៀតផង។
