ស្របពេលឱកាសតាំងពិពរណ៍សៀវភៅថ្នាក់ជាតិ នៅបណ្ណាល័យជាតិលើកទី៨ នៃព្រះរាជាណាចក្រកម្ពុជា សម្តេចនាយករដ្ឋមន្ត្រី ហ៊ុន សែន បានប្រកាសចែកសៀវភៅជាច្រើនម៉ឺនក្បាលដល់រដ្ឋ ពិសេសគឺ សិស្សានុសិស្សដែលមានចំណង់ចំណូលចិត្តអានសៀវភៅ អាចទៅយកសៀវភៅទាំងនោះបាន នៅក្នុងបណ្ណាល័យជាតិ។
កាលពីម្សិលមិញ ប្រព័ន្ធផ្សព្វផ្សាយក្នុងស្រុកមួយ (BC) បានចុះផ្សាយថា «សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានផ្តល់អំណោយជាសៀវភៅពុម្ពរាប់ម៉ឺនក្បាលជូនដល់អ្នកចូលចិត្តអានសៀវភៅក្នុងពិធីតាំងពិព័រណ៍សៀវភៅថ្នាក់ជាតិប្រចាំឆ្នាំនៅបណ្ណាល័យជាតិចាប់ពីថ្ងៃសុក្រទី១៣ធ្នូនេះតទៅ ។ សៀវភៅបីចំណងជើងខុសៗគ្នា ហើយដែលត្រូវបានបោះពុម្ពផ្សាយកាលពីជិត ១០០ឆ្នាំមុន ត្រូវបានរៀបរៀងឡើងវិញក្នុងនោះមានសៀវភៅ ស្រីហិតោបទេស ក្រមង៉ុយ និង អ៊ូ ចុង ដើម្បីចែកជូនជាចំណងដៃ និងលើកទឹកចិត្តដល់អ្នកចូលចិត្តអានសៀវភៅចាប់ពីថ្ងៃទី១៣ ដល់១៥ ខែធ្នូ ឆ្នាំ២០១៩»។
ក្រុមការងាររបស់សហភាពសហព័ន្ធយុវជនកម្ពុជា ដែលមានលោក ហ៊ុន ម៉ានី កូនប្រុសពៅរបស់សម្តេច ហ៊ុន សែន ជាប្រធាន បានស្ម័គ្រចិត្តចូលរួមរៀបចំចែកចាយសៀវភៅទាំង៣ ចំណងជើងនោះនៅបណ្ណាល័យជាតិផ្ទាល់តែម្តង។ ចង់បានសៀវភៅទាំងនេះ អាចទៅរកនៅបណ្ណាល័យជាតិចាប់ពីថ្ងៃទី ១៣ដល់ថ្ងៃទី១៥ ខែធ្នូនេះតទៅ នៅបណ្ណាល័យជាតិកម្ពុជា៕
