«ប្រមុខសេតវិមាន» គ្រប់គ្នាប្រហែលជាអាចដឹងយ៉ាងប្រាកដថា សៀវភៅនេះនឹងនិយាយអំពីប្រធានាធិបតីអាម៉េរិក ពីព្រោះពាក្យសេតវិមាន (The White House) គឺសំដៅទៅដល់វិមានរដ្ឋាភិបាល អាម៉េរិក កន្លែងដែលប្រមុខរដ្ឋនិងជាប្រមុខរដ្ឋាភិបាលធ្វើការ។ តើមានអ្វីគួរឱ្យចាប់អារម្មណ៍អំពីប្រមុខរដ្ឋអាម៉េរិក ចាប់ពីប្រធានាធិបតីទី១ លោក ចច វ៉ាស៊ីនតុន រហូតដល់មហាសេដ្ឋីសក់ទង់ដែង សំដីធំ លោក ដូណាល់ត្រាំ ប្រធានាធិបតីទី៤៥? មានព្រឹត្តិការណ៍សំខាន់ៗអ្វីខ្លះ ដែលកើតឡើងក្នុងរដ្ឋបាលនីមួយៗរបស់ពួកគាត់?
ចូរកុំភ្លេចថា អាម៉េរិកគឺជាមហាអំណាចពិភពលោកទី១ ទាំងសេដ្ឋកិច្ចនិងយោធា ហើយការផ្តើមឡើងខ្លាំងក្រោយសម័យសង្គ្រាមលោកទាំងពីរលើក។ ប៉ុន្តែតាមពិតទៅ អាម៉េរិកត្រូវបានធ្វើឱ្យខ្លាំងមិនមែនត្រឹមតែរយៈពេលក្រោយសង្គ្រាមនោះទេ ប៉ុន្តែគឺគ្រប់ពេលចាប់តាំងពីដើមកំណើតរបស់ខ្លួនមក។ ទទួលឯករាជ្យក្នុងឆ្នាំ១៧៧៦ អាម៉េរិកដែលជាដែនដីក្រោមអាណានិគមបរទេស បានបន្តរីកមុខមាត់រហូតក្លាយជាមហាអំណាចផុតលេខលើលោក ពិតជាមិនមែនរឿងងាយស្រួលឡើយ។ ដូចនេះ បុគ្គលដែលជាប្រមុខរដ្ឋ ដែលបានអង្គុយក្នុងតំណែងកំពូលក្នុងវិមានស (The White House) ឬសេតវិមាននេះ ក៏ប្រាកដជាមានរឿងគួរឱ្យកត់សម្គាល់ជាច្រើន។ ការដឹកនាំគ្រួសារនិងអង្គភាពមួយ គឺជាកិច្ចការលំបាកហើយ ចុះទម្រាំការដឹកនាំប្រទេសមួយឱ្យក្លាយជាកំពូលប្រទេសក្នុងពិភពលោក ហើយត្រូវបន្តរាប់រយឆ្នាំជាមួយមនុស្ស៤៥រូប តើពិបាកយ៉ាងណា! ដូចនេះ សៀវភៅមួយក្បាលនេះនឹងរៀបរាប់ឱ្យលោកអ្នកស្គាល់ពីមនុស្សទាំង៤៥រូបនោះ ជាមួយរឿងគួរឱ្យកត់សម្គាល់និងចាប់អារម្មណ៍ជាច្រើនទៀត។ បើនិយាយអំពីអាម៉េរិក ដែលជាក្បាលម៉ាស៊ីនសេដ្ឋកិច្ច និងតាំងខ្លួនជាបងធំពិភពលោកក្នុងនាមជាមហាអំណាចយោធា ប្រាកដណាស់ថា ព្រឹត្តិការណ៍ធំៗសុទ្ធតែជាប់ពាក់ព័ន្ធជាមួយទោះបីតិចឬច្រើនក្តី។
ទោះបីយ៉ាងណាក៏ដោយ សៀវភៅដែលមានកម្រាស់ត្រឹមជាង៣០០ទំព័រនេះ មិនអាចរៀបរាប់អស់និងបានស៊ីជម្រៅ ជុំវិញរឿងរ៉ាវរបស់ប្រធានាធិបតីទាំងអស់ ឬប្រវត្តិសាស្រ្តអាម៉េរិកទាំងមូលបានឡើយ។ វាគ្រាន់តែអាចធ្វើឱ្យយើងស្គាល់ត្រឹមប្រធានាធិបតីទាំងអស់នូវចំណុចខ្លះៗ រួមទាំងព្រឹត្តិការណ៍សំខាន់ៗមួយចំនួនដែលបានកើតឡើងប៉ុណ្ណោះ។ រឿងពិតម្យ៉ាងទៀតគឺ កម្រិតនៃការយល់ដឹងរបស់យើងខ្ញុំដែលជាអ្នកប្រែសម្រួលនិងរៀបរៀង ក៏មិនអាចធានាឱ្យបានមួយរយភាគរយ ចំពោះចំណេះដឹងទាំងឡាយដែលមាននៅទីនេះថា គ្រប់គ្រាន់សម្រាប់ប្រិយមិត្តទាំងអស់គ្នាដែរ។ ប៉ុន្តែរឿងសំខាន់មួយ គឺឱកាសដែលខ្ញុំអាចបានរៀបរៀងវាឱ្យចេញជារូបរាងឡើង ហើយទទួលបានការគាំទ្រពីបងប្អូនទាំងអស់គ្នា។ មិនមែនជាកិច្ចសន្យាផ្លូវការ ប៉ុន្តែអាចត្រឹមជាការប្តេជ្ញាចិត្តរបស់ខ្ញុំនៅពេលខាងមុខថា នឹងអាចរៀបរៀងសៀវភៅបន្ថែម ដែលអាចលំអិតអំពីដំណើរជីវិតរបស់ពួកគាត់បានច្រើនជាងនេះ។
