ដូណាល់ត្រាំ គឺជាឈ្មោះដ៏ពេញនិយមបំផុតនៅអាម៉េរិក ពិសេសគឺក្រុងញូយ៉ក ដោយសារកេរតំណែងនិងភាពជោគជ័យក្នុងជំនួញវិស័យអចលនទ្រព្យរបស់ខ្លួន។ អ្វីដែលធ្វើឱ្យពិភពលោក កាន់តែស្គាល់បុរសសក់ទង់ដែងរូបនេះ គឺតាមរយៈពាក្យមួយឃ្លាគឺ “គិតឱ្យបានធំ” ឬ THINK BIG ហើយចុងក្រោយគឺអ្វីដែលបានរៀបរាប់យ៉ាងច្រើនក្នុងសៀវភៅនេះ គឺកិច្ចការទាំងឡាយដែលលោកបានធ្វើ ក្នុងនាមជាប្រធានាធិបតីសហរដ្ឋអាម៉េរិក។
និយាយដោយស្មោះត្រង់ទៅ ខ្ញុំមិនសូវស្គាល់និងមិនសូវចាប់អារម្មណ៍ខ្លាំងចំពោះមហាសេដ្ឋីអាម៉េរិករូបនេះឡើយ រហូតដល់ពេលដែលលោកនាយកក្នុងក្រុមហ៊ុនរបស់ខ្ញុំមួយរូប ចាប់ផ្តើមនិយាយអំពីគាត់។ ប៉ុន្តែអ្វីដែលកាន់តែទាក់ចិត្តខ្ញុំបន្ថែម នៅពេលដែលដូណាល់ត្រាំ បានក្លាយជាបេក្ខភាពប្រធានាធិបតី ហើយបានជាប់ឆ្នោតជាប្រមុខសេតវិមានអាម៉េរិក កាលពីឆ្នាំ២០១៦។ ក្នុងរដ្ឋបាលរបស់ខ្លួនត្រឹមតែជាង៣ឆ្នាំប៉ុណ្ណោះ ប៉ុន្តែលោកបានធ្វើកិច្ចការគួរឱ្យកត់សម្គាល់ជាច្រើន ហើយនេះក៏ជាមូលហេតុមួយដែលជម្រុញទឹកចិត្តរបស់ខ្ញុំឱ្យរៀបរៀងសៀវភៅនេះឡើងដែរ។
សូមបញ្ជាក់ជូនបងប្អូនប្រិយមិត្តអ្នកអានថា សៀវភៅមួយក្បាលនេះ មិនសូវបានលំអិតខ្លាំងជុំវិញដំណើរជីវិតរបស់លោកក្នុងវិថីជំនួញ និងរឿងផ្ទាល់ខ្លួន (Personal Life) ច្រើននោះទេ ប៉ុន្តែហាក់បានរៀបរាប់ច្រើនគួរសមក្នុងពេលដែលលោកធ្វើជាប្រធានាធិបតីអាម៉េរិក។ ជាធម្មតាសម្រាប់សៀវភៅទូទៅ ក៏ដូចជាសៀវភៅមួយក្បាលនេះ គឺចាំបាច់ត្រូវធ្វើការថែមថយជានិច្ច ដើម្បីធ្វើឱ្យវាកាន់តែឆ្ងាញ់ពិសាសម្រាប់បងប្អូន។ ពាក្យថា “ឆ្ងាញ់” ក្នុងន័យនៅពេលនេះ គឺសំដៅដល់ «ប្រយោជន៍» ជាចំណេះដឹងសម្រាប់ខួរក្បាលរបស់ប្អូនអ្នកអាន។
