“និទានបើកបញ្ញា”??? តើអ្នកជាបុគ្គលដែលមានបញ្ញាខ្សោយមែនទេ ទើបត្រូវអានសៀវភៅនេះ? តាមការពិត “និទានបើកបញ្ញា” ជាសៀវភៅដែលអ្នកមិនគួររំលងពេលអ្នកទំនេរពីការងារ និងការសិក្សា។ ជាការពិតមនុស្សស្ទើរតែ ៩០% ទៅហើយ ដែលតែងចំណាយពេលលើទូរស័ព្ទនៅពេលទំនេរ ក្នុងនោះក៏មានខ្ញុំដែរ។ ខ្ញុំបានទស្សនាខ្សែវីដេអូអប់រំដែលមានលើវេបសាយល្បីៗ ពេលនោះ ខ្ញុំមានគំនិតថា តើជាការល្អទេ ប្រសិនបើប្រមូលផ្ដុំរឿងទាំងនោះ ហើយចែករំលែកឱ្យអ្នកដទៃ? ខ្ញុំជាបុគ្គលម្នាក់ ដែលពិតជាបានផ្លាស់ប្ដូរគំនិតជាច្រើន បន្ទាប់ពីត្រូវពាល់ដោយអត្ថន័យអប់រំដែលមាននៅក្នុងសាច់រឿងទាំងនេះ។
ជាមួយសាច់រឿងខ្លីៗចំនួន ៧១រឿង សុទ្ធតែបង្កប់នូវគំនិតអប់រំ មិនថា ន័យត្រង់ឬន័យធៀប ហើយនៅខាងចុងរឿងនីមួយៗ ភាគច្រើនសុទ្ធតែបង្ហាញនូវតម្លៃអប់រំ ភ្ជាប់ជាមួយរូបភាពផងដែរ។ សាច់រឿងទាំងអស់ត្រូវបានបកប្រែនិងកែសម្រួល ពីវីដេអូអប់រំដ៏ល្បីល្បាញមួយចំនួន ដែលទទួលបានការគាំទ្រយ៉ាងច្រើនពីមនុស្សជុំវិញពិភពលោក។ សៀវភៅនេះរៀបរៀងឡើង ក្នុងគោលបំណងចូលរួមលើកកម្ពស់ការអាននៅកម្ពុជា ក៏ដូចជាពាំនាំនូវគំនិតពិចារណា ផ្សេងៗ តាមរយៈផ្ទៃសាច់រឿងនីមួយៗ។
សង្ឃឹមថា “និទានបើកបញ្ញា” នឹងចូលរួមជាគតិក្នុងការត្រិះរិះពិចារណាហេតុផល ផ្ដល់នូវអាហារគំនិត រំឭកដាស់តឿន ជំរុញលើកទឹកចិត្ត បណ្ដុះនូវគុណធម៌ មេត្តាធម៌ និងសង្គហធម៌។ បន្ថែមពីលើនេះ សូមឱ្យគំនិតក្នុងសាច់រឿង ចូលទៅពញ្ញាក់ស្មារតីមិត្តអ្នកអាន អាចមើលឃើញពីសម្រស់បញ្ហាជីវិតរៀងៗខ្លួន ព្រមទាំងបង្កើននូវ សតិ និងបញ្ញាក្នុងការរស់នៅផងដែរ។ សូមរីករាយក្នុងស្វែងរកសាច់រឿងណាដែលត្រូវនឹងសាច់រឿងរបស់អ្នក និងសង្កេតថា តើវិធីដោះស្រាយប្រើប្រាស់ដូចគ្នាដែរទេ?
