មានក្រុមហ៊ុនជាច្រើន នៅមានបញ្ហាក្នុងការគ្រប់គ្រងបុគ្គលិកដើម្បីដំណើរល្អតាមរយៈការផ្តល់សេវាល្អ និងមានគុណភាពទៅដល់អតិថិជន។ ក្រុមហ៊ុនខ្លះក៏មានបុគ្គលិកល្អហើយ ប៉ុន្តែបុគ្គលិកនោះនៅមិនបានយូរ។ បុគ្គលិកក្រុមហ៊ុនហ៊ុនចេញចូលៗ នេះមិនមានជាសញ្ញាណល្អប៉ុន្មាននោះទេ ហើយអ្នកខ្លះមានបុគ្គលិកខូចហើយដកមិនបានជាដើម។
យើងខ្ញុំសូមណែនាំគន្លឹះ ៥ចំណុចងាយៗ ក្នុងការគ្រប់គ្រងធនធានមនុស្សរបស់លោកអ្នកឲ្យបានល្អ៖
ចំណុចទី១: Select រើសមនុស្សឱ្យត្រូវ៖ ម្ចាស់ក្រុមហ៊ុន ឬ អ្នកគ្រប់គ្រងធនធានមនុស្សក្នុងក្រុមហ៊ុន ត្រូវស្វែងយល់ពីគន្លឹះធ្វើម៉េចដើម្បីឱ្យត្រូវមានន័យត្រូវជំនាញ។ អ្នកគ្រប់គ្រងត្រូវបង្កើតការធ្វើតេស្តដើម្បីដកពិសោធន៍ក្នុងការស្វែងយល់ពីសមត្ថភាពជំនាញ និង សមត្ថភាពធ្វើការជាក្រុម និងធ្វើការក្នុងបរិបទណាមួយដែលស្របទៅតាមក្រុមហ៊ុនរបស់យើងម្នាក់ៗ។ ពេលនោះទើបដល់ការសម្ភាសន៍ ហើយត្រូវចាំដែរថា កុំប្រញាប់រើសពេកត្រូវបង្កើតជាជម្រើសឱ្យច្រើន ហើយបើគ្រាន់តែរើសដើម្បីបំពេញប្រអប់ហើយគ្មានគុណភាពធ្វើបណ្តើរៗល្អជាង។
ចំណុចទី២: Train ណែនាំឱ្យស្គាល់បរិបទថ្មី៖ ពោលពេលរើសបានហើយត្រូវណែនាំ(Orient)ពួកគេឱ្យស្គាល់និងយល់ពីរបៀបរបប និងការងារក្នុងក្រុមហ៊ុនរបស់យើងព្រោះពេលខ្លះបុគ្គលិកដែលចូលមកអ្នកខ្លះអត់មានបទពិសោធការងារ អ្នកខ្លះធ្លាប់ធ្វើការងារ ហើយបើទោះបីធ្លាប់ធ្វើការងារប្រហាក់ប្រហែលមែន ប៉ុន្តែបរិបទ និងវប្បធម៌ខុសគ្នា។ ចំណាំមិនត្រូវរើសភ្លាមឱ្យធ្វើការភ្លែតនោះទេ ការងារខ្លះនឹងធ្វើឱ្យមានបញ្ហាប្រសិនការងារបច្ចេកទេសឬបច្ចេកវិទ្យា។
ចំណុចទី៣: Use potentiality៖ ត្រូវដាក់មនុស្សឱ្យត្រូវសក្តានុពលនិងជំនាញរបស់ពួកគេ។ ថ្នាក់ដឹកនាំក្រុមហ៊ុន ត្រូវប្រើប្រាស់បុគ្គលិកដែលមានសក្តានុពលទាំងឡាយឱ្យត្រូវនឹងសក្តានុពលរបស់ពួកគេព្រោះថាមនុស្សមានជំនាញខុសៗគ្នា អុ្នកខ្លះចេះច្រើនដែលត្រូវប្រើឱ្យអស់លទ្ធភាពដោយការសាកកិច្ចការងារថ្មីៗបន្ថែមឱ្យពួកគាត់ និងបន្តបណ្តុះបណ្តាលពួកគាត់ឱ្យ ហើយកុំទាន់មានប្រតិកម្មប្រសិនបើពពួកគាត់បង្កើតកំហុស។
ចំណុចទី៤: Keep រក្សាបុគ្គលិកល្អ៖ វិធីសាស្ត្រថែបុគ្គលិក គឺជាបញ្ហាមួយរបស់ម្ចាស់ក្រុមហ៊ុន ឬថ្នាក់ដឹកនាំព្រោះថាអ្នកទាំងនោះ ត្រូវការការដឹកនាំក្រុមហ៊ុនមួយល្អ (Good Management) និងស្តង់ដារការងារច្បាស់លាស់។ ត្រូវចំណាំថា បុគ្គលិកល្អតែងតែត្រូវការកិច្ចការងារឱ្យផ្តល់ឱ្យច្បាស់លាស់ ការងារបំពេញប្រចាំថ្ងៃច្បាស់លាស់ និងមានឋានៈតួនាទីមួយជាក់លាក់ (កុំឱ្យគេនិយាយថាមិនដឹងការងារជាស្អីៗ ច្រឡំបល់អស់ មិនដឹងអ្នកណាទទួលខុសត្រូវលើការងារណាមួយ…) ហើយបុគ្គលិកបែបនេះ ត្រូវតែលើកទឹកចិត្តជាដាច់ខាត ឬការដំឡើងប្រាក់ខែ ព្រោះមិនត្រឹមតែថែបុគ្គលិកល្អមួយដែលកំពុងធ្វើប៉ុណ្ណោះទេ វាថែមទាំងជះឥទ្ធិពលដល់បុគ្គលិកផ្សេងទៀតដែរ។ (កុំឱ្យគេថា មើលវា ធ្វើចង់ងាប់គ្មានបានអីផង តើប្រឹងធ្វើអី)។
ចំណុចទី៥: Terminate៖ ការបញ្ឈប់បុគ្គលិកដែលមានកំហុសដល់ថ្នាក់បណ្តេញចេញគឺ ចាក់គ្រឹះជុំវិញឱ្យមាំទើបសឹមដក។ មានន័យថា ពង្រឹងមនុស្សនៅជុំវិញបុគ្គល(ក)ដែលប្រព្រឹត្តិកំហុសនោះ ហើយត្រូវឱ្យធានានិងប្រាកដថាការងារដែល «ក» កំពុងធ្វើបុគ្គលិកផ្សេងទៀតអាចធ្វើបានយ៉ាងមានប្រសិទ្ធភាពដូចគ្នា។ បើធ្វើបានយ៉ាងដូចនេះហើយទើបដកបានដោយមិនមានបញ្ហា។ បើមិនដូចនេះទេ ពេលដែលដកដោយមិនបានចាក់គ្រឹះឱ្យមាំនោះទេ វានឹងធ្វើឱ្យក្រុមហ៊ុន និងបុគ្គលិកមានភាពរង្គ្រោះរង្គើ។
ផលវិបាកនៅពេលដែលរង្គ្រោះរង្គើក្រុមហ៊ុនទប់លែងបាន ក៏ហៅបុគ្គលិកនោះឱ្យត្រឡប់មកវិញថែមទៀតផងនោះគឺជាភាពបរាជ័យនៃការគ្រប់គ្រងបុគ្គលិកមួយកម្រិតដែរ។ ត្រង់ចំណុចនេះ ម្ចាស់ក្រុមហ៊ុន ឬថ្នាក់ដឹកនាំមួយចំនួនមិនបានអនុវត្តយ៉ាងដូចនេះទេ គឺខ្វះយុទ្ធសាស្ត្រក្នុងការគ្រប់គ្រង និងថែរក្សានិរន្តរភាពរបស់ក្រុមហ៊ុន៕
អត្ថបទដកស្រង់៖ Home Ducation
