«មហា យក្សចិន» នេះជាឈ្មោះនៃចំណងជើងសៀវភៅ ហើយគ្រាន់តែឃើញឈ្មោះរបស់អ្នកនិពន្ធ គឺលោកហ្សង់ ហ្វ្រង់ស័រ តាន់ គេច្បាស់ជាយល់បានភ្លាមថា នេះជាសៀវភៅមួយស្ដីពីការវិភាគនយោបាយប្រទេសចិន។
ដោយអ្នកនិពន្ធនេះជា អ្នកអត្ថាធិប្បាយនៅវិទ្យុមួយ ល្បីខាងការវិភាគនយោបាយពិភពលោក ដែលទាក់ទងនិងទំនាក់ទំនងផ្ទៃក្នុង និងការបរទេសរបស់បណ្ដាប្រទេសនានា ពិសេស គឺ ពួកមហាអំណាច។
ប្រសិនបើ លោក អ្នកបានបើកមើលមួយត្រួត នោះលោក អ្នក ប្រាកដជាបានឃើញអ្នកនិពន្ធ រៀបរាប់ ពីរបត់នយោបាយ និងយុទ្ធសាស្ត្រ នានារបស់ចិន ក្នុងការទប់ទល់នឹងអាមេរិក ជប៉ុន តៃវ៉ាន់ និងប្រទេសមួយចំនួនទៀត។ លោក ក៏បាននិយាយផងដែរពីទំនាក់ទំនងរបស់ចិន ជាមួយនឹងរុស្សី ពីជាសត្រូវ មកជាមិត្ត ។
លោកខំរៀបរាប់ពីនយោបាយចិន ក្នុងការប្រជែងយកមហាអំណាចលេខ១ ដោយចោទជាសំណួរថា «តើជិតដល់វេនប្រទេសចិនហើយឬ ដែលត្រូវជាប់លេខ១ពិភពលោក?» បន្ថែមពីនេះ អ្នកនិពន្ធខិតខំពន្យល់ ពីទំនាក់ទំនងចិន និងអាមេរិក ដោយគាត់បានធ្វើការវិភាគទៅលើការលូកដៃប្រជែងគ្នារបស់ ប្រទេសទាំងពីរ នៅក្នុងតំបន់អាស៊ី។
និយាយដោយរួមទៅ អ្នកនិពន្ធរូបនេះ ព្យាយាមបង្ហាញពីនយោបាយចិន ក្នុងសតវត្សទី២១ ពីដំណើរវិវឌ្ឍនានារបស់ប្រទេសចិន ដែលនាំឱ្យចិនមានដូចសព្វថ្ងៃនេះ ហើយជាអ្វីដែលនាំឱ្យលោកហៅចិនជា មហាយក្ស ។
អ្នកកាសែតមានបទពិសោធជាង២០ឆ្នាំនេះ បានខំសរសេរតាមរបៀបការអត្ថាធិប្បាយតាមវិទ្យុរបស់គាត់ ជារបៀបភាសានិយាយ ធ្វើឱ្យសៀវភៅរបស់លោក មានលក្ខណៈសាមញ្ញ ចាប់អារម្មណ៍និងងាយយល់។
លោក ហ្សង់ ហ្វ្រង់ស័រ តាន់ បានថ្លែងប្រាប់ថា លោកសរសេរសៀវភៅនេះឡើង ក្នុងបំណងឱ្យប្រជាជនខ្មែរ ពិសេសសិស្ស និស្សិត យល់អំពីស្ថានភាពនយោបាយ និងទំនាក់ទំនងអន្តរជាតិនាពេលបច្ចុប្បន្ន។ បំណងមួយ ដែលជំរុញលោកសរសេរសៀវភៅនេះ ក៏ចង់ឱ្យខ្មែរផ្លាស់ប្តូរ ការគិតអវិជ្ជមានទៅលើបរទេស ដោយលោក មានប្រសាសន៍ថា៖ «វិភាគទានមួយនេះ អាចជាការជួយបើកចំហចិត្តគំនិតកូនខ្មែរឱ្យរឹងរឹតតែទូលាយ ឱ្យយល់ថា មិនមែនមានតែបញ្ហាខ្មែរ យួន សៀម មួយទេដែលទាក់ទិននឹងប្រទេសកម្ពុជា នៅក្នុងទ្វីបអាស៊ីបច្ចុប្បន្ន»។ លោកបានសង្កត់ធ្ងន់ថា៖ «នៅក្នុងក្របខ័ណ្ឌនៃទំនាក់ទំនងអន្តរជាតិ គ្មានទេសត្រូវ គ្មានទេមិត្ត មានតែប្រយោជន៍មួយគត់»។
