ស្ថាបនាធុរកិច្ចថ្មី ជាសៀវភៅបោះពុម្ពក្នុងស្រុកដែលត្រូវបានសរសេរអំពី ធុរកិច្ចថ្មីស្តង់ដារ ដំបូងគេ។ ធុរកិច្ចថ្មី ខុសពីអាជីវកម្មទូទៅ ហើយសៀវភៅនេះបង្ហាញយ៉ាងទូលំទូលាយលើវិស័យធុរកិច្ចថ្មីនៅកម្ពុជា ដែលស្ថាបនិកធុរកិច្ចថ្មី និងយុវវ័យខ្មែរពុំគួររំលង។ រដ្ឋាភិបាលកំពុងជំរុញគោលនយោបាយសេដ្ឋកិច្ចឌីថីថលនៅក្នុងប្រទេស ខណៈប្រជាជនខ្មែរកាន់តែច្រើនកំពុងសម្របខ្លួនក្នុងការរស់នៅជាមួយបច្ចេកវិទ្យាហិរញ្ញវត្ថុ ដឹកជញ្ជូន និងពាណិជ្ជកម្មអេឡិចត្រូនិក ដែលទាំងអស់នេះបញ្ជាក់ពីឱកាស និងចន្លោះទីផ្សារធំសម្រាប់លោកអ្នកចាប់ផ្តើមធុរកិច្ចថ្មីនៅពេលនេះ។
ស្ថាបនាធុរកិច្ចថ្មី គ្របដណ្តប់លើចំណុចសំខាន់ៗលើការចាប់ផ្តើមធុរកិច្ចថ្មីនៅកម្ពុជាផ្អែកលើស្ថានភាពបច្ចុប្បន្ន ជាពិសេសបញ្ហាចម្បងៗជាមួយដំណោះស្រាយ ដែលក្រុមស្ថាបនិកប្រឈម ដូចជាការបង្កើតក្រុម និងការបង្កើនដើមទុន។ ក្នុងនោះក៏មានដំណេះដឹងល្អៗដែលពុំទាន់ត្រូវបានផ្សព្វផ្សាយទូលំទូលាយនៅកម្ពុជា និងក្នុងវិស័យធុរកិច្ចថ្មី ជាក់ស្តែងដូចជារបៀបដំណើរការភាគហ៊ុនបុគ្គលិក ឬ Stock Options និងដំណើរការបង្កើនទុនតាមរយៈបំណុលអាចបំប្លែងបាន ឬ Convertible Debt ជាដើម អមដោយគំរូឧទាហរណ៍យ៉ាងសំបូរបែបជំរុញឲ្យអ្នកអានងាយយល់។
