សៀវភៅអាថ៌កំបាំងទាំងប្រាំ(មូលដ្ឋានគ្រឹះដើម្បីឆ្ពោះទៅរកឧតម្តភាពនៃជីវិត) គឺជាសៀវភៅមួយដែលត្រូវបានសរសេរឡើងដោយសម្រិតសម្រាំងបំផុត ឆ្លើយកាត់តាមរយៈបទពិសោធន៍ជីវិតជាក់ស្តែងរយៈពេលជិតម្ភៃឆ្នាំជាអ្នកបណ្តុះបណ្តាលនិងធុរកិច្ចករ។ មិនថាអ្នកស្ថិតក្នុងអាជីពអ្វីនោះទេ អាថ៌កំបាំងទាំងប្រាំនេះគឺសុទ្ធតែអាចរុញច្រានជីវិតអ្នកឱ្យទទួលបាននូវភាពស្រស់បំព្រង ជោគជ័យក្នុងការងារ ទំនាក់ទំនងល្អជាមួយអ្នកនៅជុំវិញ ធ្វើឱ្យគ្រួសារមានសុភមង្គល មានសុខភាពផ្លូវកាយ និងចិត្តល្អ ព្រមជាមួយគ្នា ពោលដោយខ្លី គឺគុណភាពនៃជីវិត។ លក្ខខណៈពិសេសនៃសៀវភៅនេះគឺគ្រប់ជំពូកទាំងអស់មានការពន្យល់បង្ហាញយ៉ាងលម្អិតនិងមានផ្តល់ជាឧទាហរណ៍ជាក់ស្តែងពីបុគ្គលល្បីៗជោគជ័យទាំងជាតិនិងអន្តរជាតិជាច្រើន។ ជាពិសេសនោះ អ្នកនឹងមានឱកាសអនុវត្តន៍លំហាត់ជាច្រើន ដើម្បីឆ្លុះបញ្ចាំងពីមេរៀនជាក់ស្តែងរាល់ចំណុចនីមួយៗដែលអ្នកបានអានចប់។ ការអប់រំដ៏ត្រឹមត្រូវ សុខភាពល្អ ការគិតដ៏ត្រឹមត្រូវ ការប្រាស្រ័យទាក់ទងដ៏ត្រឹមត្រូវ និងការសម្រេចចិត្តដ៏ត្រឹមត្រូវ គឺជាមូលដ្ឋានគ្រឹះដ៏រឹងមាំ និងមិនអាចខ្វះបាន ដើម្បីញ៉ាំងឱ្យជីវិតឆ្ពោះទៅរកឧត្តមភាពយ៉ាងពិតប្រាកដ។
អំពីអ្នកនិពន្ធ
មានស្រុកកំណើតនៅភូមិបាណក ឃុំបារាយណ៍ ស្រុកបារាយណ៍ ខេត្តកំពង់ធំ។ លោកគុណ វិជ្ជាបានប្រសូតនៅថ្ងៃទី១៤ ខែកក្តដា ឆ្នាំ១៩៨៣។ លោកគុណ វិជ្ជា ជាកូនទី២ក្នុងចំណោមបងប្អូន៧នាក់ (ប្រុសបួននាក់និងស្រី៣នាក់)។ លោកឪពុកឈ្មោះ វ៉ាន់ ចំរើន ជាកសិករនិងអ្នកម្តាយឈ្មោះ ណាំ សាត ជាកសិកររស់នៅក្នុងភូមិស្រុកខាងលើ។
លោកគុណ វិជ្ជាបានបញ្ចប់ថ្នាក់បរិញ្ញាបត្រគ្រប់គ្រងទូទៅ (Bachelor Business of Adminstration)បរិញ្ញាបត្រជាន់ខ្ពស់គ្រប់គ្រងការអភិវឌ្ឍន៍ (Master of Development in Management) និងបរិញ្ញាបត្រជាន់ខ្ពស់ឯកទេសបង្រៀនភាសាអង់គ្លេស (Master of Arts in TESOL)។
ដោយស្រឡាញ់ការអាន ការសរសេរនិពន្ធ ការបណ្តុះបណ្តាល និងការបង្វឹក លោកគុណ វិជ្ជាបានវិនិយោគកម្លាំងកាយ កម្លាំងចិត្ត បញ្ញាស្មារតី និងពេលវេលាជិត២០ឆ្នាំទៅលើការបណ្តុះបណ្តាលអភិវឌ្ឍធនធានមនុស្សនៅកម្ពុជា។ លោកវិជ្ជាមានជំនាញទៅលើ៖ ការប្រាស្រ័យទាក់ទងសម្រាប់អ្នកលក់ ការជម្រុញលើកទឹកចិត្តបុគ្គលិកដើម្បីបង្កើនផលិតភាពការងារ ការអភិវឌ្ឍន៍ខ្លួនឯង និងការនិយាយជាសាធារណៈ។
ក្រៅពីហ្នឹង លោកគុណ វិជ្ជាទទួលបានវិញ្ញាបនបត្រគ្រូបង្កោល (Master Trainer) ក្នុងការបណ្តុះ បណ្តាលសម្រាប់សហគ្រាសខ្នាតតូចនិងមធ្យម(MSME&SME)។
