តើ «ផ្លូវសូត្រ» ជាអ្វី? តើវាជាផ្លូវរបស់ប្រទេសចិនឬយ៉ាងណា? ហេតុអ្វីគេហៅវាថាផ្លូវសូត្រ ស្របពេលដែលមានទំនិញរាប់មិនអស់ត្រូវបានចរាចរពាសពេញផ្លូវអស់ទាំងនោះ?
មូលហេតុសំខាន់ដែលគេហៅបណ្ដាញផ្លូវទាំងនោះថា “ផ្លូវសូត្រ” គឺគេយោងទៅលើឥទ្ធិពលដ៏ធំធេងនិងភូមិសាស្ត្រធំទូលាយនៃការធ្វើពាណិជ្ជកម្មនៃផលិតផលសូត្ររបស់ចិនកាលពីសម័យបុរាណ។ ការស្វែងយល់ពីផ្លូវសូត្របុរាណ ដើម្បីឆ្លុះបញ្ចាំងពីប្រព័ន្ធសេដ្ឋកិច្ចសម័យទំនើប ក៏ដូចជាគម្រោងសេដ្ឋកិច្ចនានាដែលបានផ្ដួចផ្ដើមឡើង ពិសេសគម្រោងខ្សែក្រវាត់មួយផ្លូវមួយ (One Belt, One Road) របស់ប្រទេសចិននាពេលបច្ចុប្បន្ននេះ។
ក្រៅពីសេដ្ឋកិច្ចនិងពាណិជ្ជកម្ម ផ្លូវសូត្រក៏បានដើរតួនាទីយ៉ាងសំខាន់ក្នុងប្រវត្តិសាស្រ្ត ក្នុងនាមជាទីតាំងនៃការចែករំលែកវប្បធម៌ ជំនាញ ទ្រឹស្តី សាសនា បច្ចេកទេស បច្ចេកវិទ្យា ក្បួនទ័ព យុទ្ធសាស្ត្រ និងវិទ្យាសាស្ត្រវេជ្ជសាស្ត្រផងដែរ…។
