សៀវភៅ សកលវិទ្យាល័យជីវិត ត្រូវបានបែងចែកជា៦មុខវិជ្ជាសំខាន់ៗ ដែលសុទ្ធសឹងជាមុខវិជ្ជាមូលដ្ឋានដែលអ្នកត្រូវសិក្សាឈ្វេងយល់អំពីជីវិត។ នៅក្នុងមុខវិជ្ជានីមួយៗ ត្រូវបានបែងចែកជាបីផ្នែកសំខាន់ៗ ដែលរួមមាន៖ មេរៀន កិច្ចការស្រាវជ្រាវ និងកំណត់ហេតុជីវិត។
មេរៀន៖ នៅក្នុងផ្នែកនេះ អ្នកនឹងបានឈ្វេងយល់ជាទូទៅអំពីខ្លឹមសារនៃមុខវិជ្ជាជីវិតនីមួយៗ ជាពិសេសគឺវិធីសាស្រ្តក្នុងការយកចំណេះដឹងអំពីជីវិតទាំងនោះមកប្រើនៅក្នុងជីវិតពិត។ ផ្នែកនេះក៏មានរួមបញ្ចូលនូវកម្រងទស្សនៈល្អៗ រឿងរ៉ាវរបស់បុគ្គលមួយចំនួន រួមទាំងសំណួរបំផុសគំនិតជាច្រើនសម្រាប់ទុកជាគតិពិចារណានៅក្នុងជីវិតជាក់ស្ដែង។
កិច្ចការស្រាវជ្រាវ៖ ដូចគ្នានឹងការសិក្សាក្នុងសកលវិទ្យាល័យជំនាញដែរ នៅចុងបញ្ចប់នៃមុខវិជ្ជាសិក្សានីមួយៗ អ្នកនឹងទទួលបាននូវកិច្ចការស្រាវជ្រាវ(Assignment) ដែលមានទាំងសំណួរទ្រឹស្តី ទាំងការអនុវត្តផ្ទាល់ ដែលអ្នកត្រូវធ្វើជាចាំបាច់ដើម្បីពង្រឹងការយល់ដឹងរបស់អ្នកក្នុងមុខវិជ្ជានីមួយៗផង និងដើម្បីផ្ដល់ឱកាសឱ្យអ្នកបានអនុវត្តផ្ទាល់នៅក្នុងជីវភាពរស់នៅប្រចាំថ្ងៃផង។
កំណត់ហេតុជីវិត៖ នេះគឺជាផ្នែកបន្ថែមនៅខាងចុងមុខវិជ្ជានីមួយៗ ដែលក្នុងមួយមុខវិជ្ជា អ្នកនឹងបានឃើញកំណត់ហេតុជីវិតចំនួន៤ដែលជាកម្រងអត្ថបទខ្លីៗទាក់ទងនឹងប្រធានបទនៃមុខវិជ្ជាមួយនោះ។ ប៉ុន្តែអ្វីដែលគួរឱ្យចាប់អារម្មណ៍នោះគឺមានតែកំណត់ហេតុជីវិតចំនួន២ប៉ុណ្ណោះដែលខ្ញុំបាន
សរសេររួចជាស្រេច។ ដោយឡែក ចំពោះកំណត់ហេតុចំនួន២ទៀត ខ្ញុំបានទុកចន្លោះទំនេរចោល ដើម្បីឱ្យអ្នកសរសេរបន្ថែមដោយខ្លួនឯង។ ការសរសេរកំណត់ហេតុជីវិត នឹងជួយអ្នកឱ្យយល់ដឹងបានកាន់តែស៊ីជម្រៅអំពីប្រធានបទនីមួយៗ ជាពិសេសអ្នកក៏មានឱកាសពង្រឹងសមត្ថភាពនៃការសរសេរផងដែរ។
