«ហេតុអ្វីប្រទេសមួយខ្លាំង ប្រទេសមួយខ្សោយ?» ជាចំណងជើងដែលបង្ហាញពីចម្ងល់ ប៉ុន្តែរឿងដែលគួរតែឆ្ងល់ជាងនេះគឺថា តើហេតុអ្វីខ្ញុំត្រូវរៀបរៀងសៀវភៅនេះឡើយ។
ស្ថិតក្នុងចំណោមសៀវភៅបែបចំណេះដឹងទូទៅ សៀវភៅនេះនឹងជួយពង្រីកចំណេះដឹងរបស់បងប្អូនអ្នកអាន ពិសេសក្នុងនាមជាប្រជាពលរដ្ឋម្នាក់ ដែលកំពុងរស់នៅក្នុងប្រទេសជាតិមួយ។ សៀវភៅដែលមានកម្រាស់ជាង២៣០ទំព័រនេះ នឹងបង្ហាញយើងអំពីមេរៀនប្រវត្តិសាស្រ្តពីបុរាណផង និងប្រវត្តិសាស្រ្តថ្មីៗផង ព្រមទាំងស្ថានភាពរបស់ប្រទេសជាតិនានាក្នុងលោក ដែលទទួលបានភាពរីកចម្រើនរុងរឿង និងប្រទេសដែលធ្លាក់ដុនដាបឬជួបបញ្ហា។ ការស្វែងយល់អំពីស្ថានភាពប្រទេសជាតិខ្លួន និងស្ថានភាពបណ្តាប្រទេសនានាជុំវិញពិភពលោក ពិតជាចូលរួមចំណែកក្នុងការអភិវឌ្ឍន៍ជ្រោមជ្រែងប្រទេសជាតិរបស់យើងឱ្យរីកចម្រើន និងរួមចំណែកទប់ស្កាត់បញ្ហាណាមួយ ដែលធ្វើឱ្យប្រទេសជាតិរបស់យើងធ្លាក់ចុះដុនដាបជាដើម។
ប្រជាជន គឺជាចំណែកនៃភាពរឹងមាំរបស់ប្រទេសជាតិមួយ ហើយប្រជាជនម្នាក់ៗ ក៏អាចក្លាយជាចំណែកនៃភាពវិនាសរបស់ប្រទេសជាតិមួយដែរ។ ដូចនេះការដែលប្រជាជនមានចំណេះដឹងជ្រៅជ្រះ យល់អំពីប្រវត្តិសាស្រ្ត និងស្ថានការណ៍ជាក់ស្តែង នោះពួកគេនឹងធ្វើការសម្រេចចិត្តបានត្រឹមត្រូវ និងចូលរួមសកម្មភាពបានត្រឹមត្រូវដូចគ្នាដែរ។ ឧទាហរណ៍ជាក់ស្តែងដែលមានរៀបរាប់ខ្លះៗដែរក្នុងសៀវភៅនេះ អំពីការរីកចម្រើននិងការធ្លាក់ចុះរបស់អាណាចក្រខ្មែរ ដែលត្រូវបានគេចាត់ទុកជាអាណាចក្រដ៏ខ្លាំងអស្ចារ្យមួយ ចាប់ពីសតវត្សរ៍ទី៧ រហូតដល់ទី១២ ប៉ុន្តែបែរជាចាប់ផ្តើមធ្លាក់ចុះនៅចាប់ផ្តើមពីសតវត្សរ៍ទី១៣មក។ នៅមានមេរៀនប្រវត្តិសាស្រ្តជាច្រើនទៀតរបស់បណ្តាប្រទេសមួយចំនួនដូចជា សហរដ្ឋអាម៉េរិក អ៊ីស្រាអែល ហ្វាំងឡង់ សិង្ហបុរី សូវៀត ជាដើម។ ទោះបីយ៉ាងណាក៏ដោយ វាគ្រាន់តែជាសៀវភៅដែលប្រមូលផ្តុំនូវចំណេះដឹងទូទៅ ដូចនេះវាពិតជាមិនអាចតម្រូវឱ្យបានគ្រប់តាមការចង់បានរបស់យើងឡើយ ដ្បិតចំណេះដឹង មិនមែនជាភាពគ្រប់គ្រាន់នោះឡើយ។
