នៅក្នុងពិភពលោកគ្មានរឿងអ្វីដែលសាំញ៉ាំ, ស្មុគស្មាញ និងពិបាកយល់ដូចជារឿងរបស់មនុស្សស្រីទេ។ បើអ៊ីចឹង តើពិភពលោកនឹងក្លាយជាបែបណា ប្រសិនបើគ្មានស្រ្តី? តើគ្រួសារនឹងទៅជាបែបណាបើគ្មានម្ដាយ? តើថ្នាក់រៀននឹងទៅជាបែបណា បើសិនជាគ្មានសិស្សស្រី?
ឆ្លើយតបបញ្ច្រាស់ទៅវិញ ថ្នាក់រៀនគ្មានសិស្សស្រីប្រហែលជាសោះកក្រោះ, គ្រួសារដែលគ្មានម្ដាយប្រហែលជាគ្មានភាពកក់ក្ដៅ ហើយពិភពលោកដែលគ្មានស្រ្តី ហៅថា ពិភពបុរស…។ ភាពសាំញ៉ាំរបស់នារី ធ្វើឱ្យបុរសកាន់តែមានភាពអត់ធ្មត់ ចំណែកភាពស្មុគស្មាញរបស់នារី ធ្វើឱ្យបុរសកាន់តែមានភាពឆ្លាតវៃ ហើយនៅពេលដែលគ្រប់គ្នាយល់អំពីស្ដ្រី ពិភពលោកនឹងកាន់តែស្រស់បំព្រង។
ផ្នត់គំនិតអវិជ្ជមានខ្លះ នៅតែបន្តធ្វើជាគុកសម្រាប់ស្រ្តី។ គ្រប់គ្នាប្រាកដជាធ្លាប់បានដឹង បានឮ ថែមទាំងបានឃើញផ្ទាល់ភ្នែកអំពីការដាក់គំនាបលើស្រ្តីពីសំណាក់បុរសសង្គម ឬជួនកាលជាស្រ្តីខ្លួនឯង។ ស្រ្តីពិតជាបានស្ពាយជាប់ខ្លួននូវភាពភ័យខ្លាច, ភាពអាម៉ាស់, ការបាត់បង់ជំនឿលើខ្លួនឯង ហើយលែងមើលឃើញពីតម្លៃរបស់ខ្លួន។ តើ ធ្វើដូចម្ដេច ទើបអាចរំដោះស្រ្តីចេញពីផ្នត់គំនិតអវិជ្ជមានទាំងនោះបាន?
ដំបូងគឺត្រូវចាប់ផ្ដើមពីស្រ្តីខ្លួនឯង ហើយសៀវភៅ “ថាមពលស្រ្តី” នេះគឺជាការចាប់ផ្ដើមដ៏ល្អ។ ក្នុងនេះមានគំនិតនិងទស្សនៈជាង២០០ ត្រូវបានដកស្រង់និងប្រែសម្រួលពីបុគ្គលដែលមានឥទ្ធិពលនិងគេហទំព័រល្បីៗពី ជុំវិញពិភពលោក។ ស្រ្តីគ្រប់រូបគួរតែចាប់ផ្ដើមរៀនឱ្យតម្លៃលើខ្លួនឯង មុននឹងទាមទារតម្លៃពីអ្នកដទៃ។ “ទឹកអាចធ្វើឱ្យផ្ទាំងថ្មសឹករេចរឹលបាន រឿងអ្វីដែលស្រ្តីមិនអាចផ្លាស់ប្ដូរពិភពលោកបាន?”
