សម្រាប់អ្នកដែលមានការងារធ្វើសព្វថ្ងៃនេះ ជោគជ័យចាត់ជារឿងដែលគួរឱ្យប្រាថ្នា ព្រោះជោគជ័យនាំមកនូវមោទកភាព ភាពជឿជាក់ក្នុងជីវិត ភាពគង់វង្សក្នុងជីវិតរស់នៅ កិត្តិយសកេរ្តិ៍ឈ្មោះដល់ខ្លួននិងវង្សត្រកូល។ ដូច្នេះគោលដៅរបស់និយោជិតគ្មានអ្វីផ្សេងក្រៅពីជោគជ័យនោះទេ ហើយត្រូវតែជាជោគជ័យដ៏យូរអង្វែងទៀតផង។
ការដែលយើងរស់នៅក្នុងសម័យសកលភាវូបនីយកម្ម យើងមានឱកាសនៃការយល់ដឹងឬទទួលដឹងព័ត៌មានបានស្មើគ្នានិងគ្រប់ជ្រុងជ្រោយ ទើបការប្រកួតប្រជែងកើតឡើងក្នុងគ្រប់វិស័យ។ មនុស្សដែលមិនយល់ដឹងឬឈប់ស្ងៀមមួយកន្លែងនឹងត្រូវទុកចោលឱ្យនៅខាងក្រោយ។ ការធ្វើការក៏ដូចគ្នាដែរ ប្រៀបដូចជាយើងចូលទៅកាន់ទីលានប្រកួតដែលត្រូវរត់ទៅខាងមុខគ្រប់ពេលវេលាទើបឱកាសនៃ ជោគជ័យកើតឡើងបាន។ ខណៈជាមួយគ្នា យើងត្រូវដឹងថាពេលខ្លះយើងមិនត្រឹមតែត្រូវប្រកួតនឹងខ្លួនឯងទេ តែនៅត្រូវប្រកួតជាមួយគូប្រជែងជាច្រើនទាំងពេញចិត្តនិងមិនពេញចិត្ត ទាំងដោយផ្ទាល់និងដោយប្រយោល ទើបអាចរក្សាការពារជោគជ័យទុកបានយ៉ាងយូរអង្វែង។
ក្នុងពេលបច្ចុប្បន្ន យើងសង្កេតឃើញថាអង្គភាពផ្សេងៗសុទ្ធតែចង់ជ្រើសរើសបុគ្គលិកដែលមានគុណភាពចូលមកជាក្រុមការងារហើយពេលចូលមកធ្វើការងារហើយ ត្រូវឆ្លងកាត់ការសាកល្បងជាច្រើនទម្រាំអាចទៅឈរនៅកន្លែងខ្ពស់បំផុតរហូតជាទីទទួលស្គាល់បាន។ ដូច្នេះតើមនុស្សប្រភេទណាដែលអាចទៅឈរនៅទីនោះបានយូរ រឹងមាំ និងមានជ័យជម្នះបាន ហើយគេមានវិធីយ៉ាងម៉េចខ្លះ?
