និទានកម្សាន្តចិត្តចាកជីវិត​ដែលឈឺចាប់ ភាគ២

សេចក្ដីសុខមិនមែនកើតឡើង ឬត្រូវស្វះស្វែងរកដោយលំបាក នោះទេ។ វាស្ថិតនៅក្នុងខ្លួនរបស់យើងប៉ុណ្ណោះ បើសិនជាយើងគ្រាន់តែប្រាប់ខ្លួនឯងថាយើង «សុខចិត្ដ» ឬ «ព្រមទទួល» នោះយើងនឹងឃើញថាសេចក្ដីសុខនឹងកើតឡើងដោយសារអ្វីនោះជាក់ជាមិនខាន។ រាល់ថ្ងៃ មនុស្សជាច្រើនតែងប្រើពេលឲ្យរវល់នឹងដំណើរត្រាច់ចរស្វែងរកសេចក្ដីសុខ។ អ្នកដែលមានចិត្ដខ្វះខាតខាងមនោសញ្ចេតនា
ក៏ប្រឹងចិន្ដនាការ ស្វះស្វែងរកតាមគ្រប់មធ្យោបាយដើម្បីឲ្យបានគាប់ចិត្ដអារម្មណ៍របស់ខ្លួនដែលចង់បានមានស្នេហាជាឧបមា រីអ្នកដែលខ្វះខាតខាងទ្រព្យសម្បត្ដិក៏មិនសំកុកនៅស្រណុកស្រួល រស់នៅឲ្យបានរីករាយ ប៉ុន្មានដែរ ពោលគឺ ខិតខំរិះរកស្ទើរមិនមានពេលឈប់សម្រាកដើម្បីដើរលម្ហែកាយអារម្មណ៍ដូចគេឯងឡើយ។ រកពេញមួយឆ្នាំនៅមិនទាន់គ្រប់ សូម្បីថ្ងៃបុណ្យធំៗក៏នៅតែរក រក រក គិតតែពីរកពុំមានពេលទំនេរដៃ។