ពិពណ៌នាពីសៀវភៅ
ជីវិតដែលឆ្លងកាត់រឿងរ៉ាវដែលពុំសមប្រកប ឧបសគ្គ និងបញ្ហា វាមិនត្រឹមតែធ្វើឱ្យយើងរឹងមាំតែប៉ុណ្ណោះទេ ប៉ុន្តែវាជាមេរៀន និងជាការចងចាំដ៏ល្អបំផុត។ ឱ្យតែយើងមានការតាំងចិត្ត និងមានគោលដៅមួយច្បាស់លាស់ រួចចាប់ផ្តើមធ្វើវា គឺធ្វើដោយមិនរង់ចាំថ្ងៃស្អែក នោះគ្រប់យ៉ាងនឹងបានល្អប្រសើរជាងពេលនេះ។
យើងគ្រប់គ្នាគប្បីរៀនរស់នៅជាមួយនឹងការពិត ថាជីវិតគឺជាការតស៊ូ ការលះបង់ ការអត់ធ្មត់ និងក្លាហានព្រមទទួលយកការផ្លាស់ប្តូរ ហើយរីករាយនឹងរឿងរ៉ាវថ្មីៗ។ ទោះបីជាស្ថិតក្នុងស្ថានភាពអាក្រក់បែបណាក្តី បើយើងមិនគេចវេស ដោះសា ហើយហ៊ានប្រឈមមុខ នោះគ្មានអ្វីដែលថាមិនអាចទៅរួចឡើយ។
បើយើងម្នាក់ៗខ្លាចការលំបាក តើធ្វើម្តេចអាចរកឃើញនូវដំណោះស្រាយទាំងនោះបាន? ទោះបីជា មានឧបសគ្គជាច្រើនកំពុងរង់ចាំ ប៉ុន្តែយើងក៏កំពុងដើរទៅមុខដែរ គឺដើរនៅលើផ្លូវដែលខ្លួនស្រឡាញ់ ដើរដោយភាពជឿជាក់ ហើយមិនព្រមចុះចាញ់ជាដាច់ខាត តស៊ូរហូតដល់ដំណាក់កាលនៃវិនាទីចុងក្រោយ។
អំពីអ្នកនិពន្ធ
ខ្ញុំបាទឈ្មោះ ធឿន សុធា កើតនៅឆ្នាំ១៩៨៥ ជាកូនទី២ក្នុងចំណោមបងប្អូន ៦នាក់ (ប្រុស៣ ស្រី៣)។ ខ្ញុំបានចាប់កំណើតនៅក្នុងគ្រួសារកសិករមួយ រុងរឿង ស្រុកថ្ពង ខេត្តកំពង់ស្ពី។ ខ្ញុំបាទបានចូលរៀនជាលើកដំបូង នៅអាយុ ៨ឆ្នាំ រៀនថ្នាក់ទី១ ក្នុងឆ្នាំ១៩៩៤ នៅសាលាបឋមសិក្សាភូមិថ្មី។ បន្ទាប់មក ខ្ញុំបានបន្តការសិក្សាថ្នាក់ទី៧ នៅឯអនុវិទ្យាល័យសំរោងហើយបានបានបញ្ចប់មធ្យមសិក្សាបឋមភូមិ (ឌីប្លូម) នៅឆ្នាំ២០០៣។ ខ្ញុំបានចាកចេញពីស្រុកកំណើត ដើម្បីបន្តការសិក្សាថ្នាក់ទី១០ នៅវិទ្យាល័យឧដុង្គ ដោយត្រូវស្នាក់នៅវត្តវាំងចាស់ ស្ថិតក្នុងឃុំវាំងចាស់ ស្រុកឧដុង្គ ខេត្តកំពង់ស្ពឺ ដោយបានប្រលងបញ្ចប់កម្រិតមធ្យមសិក្សាទុតិយភូមិ (បាក់ឌុប) នៅឆ្នាំ២០០៦។
ខ្ញុំបានមកសិក្សាបន្តនៅទីក្រុងភ្នំពេញ គឺនៅឆ្នាំ២០០៧ ដោយស្នាក់នៅទីតាំងស្តុកឈើមួយកន្លែង នៅម្តុំវិទ្យាល័យបឹងត្របែក។ ខ្ញុំបានចំណាយពេល៤ឆ្នាំ ដើម្បីបញ្ចប់ថ្នាក់បរិញ្ញបត្រ លើមុខជំនាញ វិទ្យាសាស្រ្តកុំព្យូទ័រ គឺនៅឆ្នាំ២០១០ នៅសាកលវិទ្យាល័យភ្នំពេញអន្តរជាតិ។ ខ្ញុំបានឱកាសទទួលបានការងារធ្វើជាលើកដំបូងនៅឆ្នាំ២០០៨ ដោយបម្រើការងារនៅក្រុមហ៊ុនឯកជនមួយ ធ្វើជាអ្នកកាត់តរូបភាព ហើយធ្វើការបានរយៈពេល ២ឆ្នាំ ក៏មានឱកាសទៅធ្វើការនៅគ្រឹះស្ថានមីក្រូហិរញ្ញវត្ថុឯកជនមួយកន្លែង ដោយធ្វើជាមន្រ្តីគ្រប់គ្រងប្រព័ន្ធព័ត៌មានវិទ្យា ហើយក៏ត្រូវនឹងជំនាញ ដែលបានសិក្សា នៅសាកលវិទ្យាល័យផងដែរ។ ខ្ញុំបានខិតខំបំពេញការងារអស់រយៈពេលជាង ៦ឆ្នាំ ដោយត្រូវបានក្រុមហ៊ុនតម្លើងតំណែងជាបន្តបន្ទាប់ តាំងពីតួនាទីមន្រី្តកម្រិតទាប រហូតបានក្លាយទៅជាប្រធានផ្នែកហើយបានលាលែង នៅចុងឆ្នាំ២០១៦។ ស្របពេលនោះ ខ្ញុំទទួលបាន ឱកាសការងារថ្មី ដែលតំណែងកាន់តែខ្ពស់ គឺធ្វើជាប្រធាននាយកដ្ឋានវិញម្តង នៅគ្រឹះស្ថានមីក្រូហិរញ្ញវត្ថុមួយទៀត រួចមកខ្ញុំក៏បានសម្រេចចិត្តបញ្ចប់អាជីពជាអ្នកធ្វើការឱ្យគេ នៅដើមឆ្នាំ២០២០។
ដោយយោងលើបទពិសោធការងារ ចំណេះជំនាញ និងចង់ដើរតាមអ្វីដែលជាក្តីស្រមៃ ឬជាគោលដៅជីវិតពិតរបស់ខ្លួនឯង ហើយវាកាន់តែធំឡើងៗដែលអាចជួយដោះស្រាយបញ្ហារបស់មនុស្សទូទៅបានច្រើន។ ដើម្បីអាចធ្វើរឿងទាំងអស់នេះបាន ខ្ញុំបានចាប់ផ្តើមបង្កើតក្រុមហ៊ុនជាមួយនឹងមិត្តភក្តិ គឺនៅដើមឆ្នាំ២០២០ ដែលមានឈ្មោះថា នទីភូមី សឹលូសិន ឯ.ក (នទី) ជាកន្លែងផ្ទុកព័ត៌មាន អំពីឱកាសការងារ បេក្ខជន និងវីដេអូល្អៗ ជាមួយប្រព័ន្ធគ្រប់គ្រងដ៏ទំនើប។ ទៅថ្ងៃអនាគត ខ្ញុំមានគោលបំណងចង់ឃើញក្រុមហ៊ុនទទួលបានជោគជ័យ មានកេរ្តិ៍ឈ្មោះល្អ ហើយជាក្រុមហ៊ុនតែមួយគត់ ដែលប្រើប្រាស់នូវបច្ចេកវិទ្យាឈានមុខគេ បានអភិវឌ្ឍឡើងដោយកូនខ្មែរយើង។ លើសពីនេះ ខ្ញុំមានក្តីស្រមៃធំធ្វើជាអ្នកនិពន្ធសៀវភៅ ជាអ្នកចែករំលែកចំណេះដឹង និងបទពិសោធជីវិតដល់អ្នកទន់ខ្សោយ៕
