…. “ជាព្រេងសំណាងមួយដ៏ធំណាស់ ដែលនាងខ្ញុំបានចាប់កំណើតនៅលើទឹកដីដូនតាសម្បូរហូរហៀរនូវសម្បត្តិធម្មជាតិគ្រប់បែបយ៉ាង ជាពិសេសមានទាំងប្រាង្គប្រាសាទរាប់ពាន់ ដែលពោរពេញទៅដោយក្បាច់ចម្លាក់រស់រវើក ជាស្នាដៃដ៏មានតម្លៃបំផុតមិនអាចកាត់ថ្លៃបាន ជាសម្បត្តិមនុស្សជាតិក្នុងពិភពលោកទាំងមូល។ ម្យ៉ាងទៀតគួបផ្សំនិស្ស័យពីកំណើតព្រមជាមួយខ្សែលោហិតបន្តវេនពីលោកឪពុក ដែលជាអ្នកកវីមួយរូបក្នុងទស្សវត្សទី៦០ផងនោះ បានជំរុញបេះដូង និងទឹកចិត្តនាងខ្ញុំឱ្យស្រឡាញ់ព្យាយាមអានសង្កេត សរសេរតាំងពីវ័យកុមារម្ល៉េះដោយមិនឹកស្មានមានថ្ងៃនេះឡើយ។
កំណាព្យជាដើមទុនដំបូង ក្នុងការសរសេររបស់នាងខ្ញុំ។ ផ្ដើមចេញពីកំណាព្យនាងខ្ញុំបានវិវត្តខ្លួនបន្ដិចម្ដងៗ មកសរសេរប្រលោមលោក និងឈានជាជំហានបន្ដបន្ទាប់ ទៅការសរសេរអត្ថបទល្ខោននិយាយ ទំនុកច្រៀង អត្ថបទភាពយន្ត និងអត្ថបទផ្សេងៗទៀតជាដើម។….”
សម្រង់វាចាអ្នកនិពន្ធ ប៉ុល ពិសី ក្នុងសៀវភៅកំណាព្យរឿង អប្សរា បោះពុម្ពនាគ្រាទី២ ដោយសមាគមអ្នកនិពន្ធខ្មែរ សហការជាមួយគ្រឹះស្ថានបោះពុម្ពឯកសារខ្មែរ ឆ្នាំ២០២១។
