កម្ទេចចិត្តអាត្មានិយម

សៀវភៅមួយក្បាលនេះគឺជាការចូលរួមចំណែកមួយផ្នែកតូច ក្នុងការបន្តដង្ហើមនៃការផ្លាស់ប្ដូរផ្នត់គំនិតរបស់ប្រជាពលរដ្ឋឱ្យមកកាន់ភាពត្រឹមត្រូវ និង តម្លៃពិតនៃជីវិតរបស់ខ្លួន ហើយសាងសង្គមមួយនេះប្រកបដោយភាពថ្លៃថ្នូរ។ ខ្ញុំសង្ឃឹមយ៉ាងមុតមាំថា នៅពេលដែលអ្នកបានកាន់សៀវភៅមួយក្បាលនេះ វាអាចជាពេលមួយដែលអ្នកត្រៀមខ្លួនរួចរាល់ក្នុងការចាប់ផ្ដើមឈ្វេងយល់ និងទម្លាក់ចោលនូវភាពអាត្មានិយមរបស់ខ្លួន ក៏ដូចជាពាល់ត្រូវឱ្យកាន់តែច្បាស់ពីសន្តានរបស់ក្រុមមនុស្សខូចៗទាំង ឡាយនៅក្នុងសង្គម។ ការចាប់ផ្ដើមអស់រយៈពេលជិត៣ឆ្នាំមកនេះ វាមិនអត់ប្រយោជន៍ឡើយ ហើយនេះជាអ្វីដែលខ្ញុំតែងតែគិតថានឹងធ្វើវាឱ្យបាន។ រាល់អត្ថបទនៅក្នុងសៀវភៅនេះសុទ្ធតែមានភ្ជាប់នូវកំណាព្យមកជាមួយ ដោយហេតុថាវានឹងអាចជាការពញ្ញាក់ស្មារតីនូវរាល់អត្ថបទដែលបានអាន ហើយ ដ្បិតកំណាព្យដែលនៅខាងចុងអត្ថបទទាំងនោះវានឹងឆ្លុះបញ្ជាំងពីខ្លឹមសារសំខាន់ៗ ដែលបានសរសេរនៅខាងលើ។ មិនថាត្រូវឆ្លងកាត់ការពិនិត្យល្អិតល្អន់ប៉ុណ្ណានោះទេ ក៏សៀវភៅមួយក្បាលនេះ ចៀសមិនផុតពីកំហុសខុសឆ្គងឡើយ។ ខ្ញុំក៏សូមបញ្ជាក់ថាពាក្យពេចន៍នៅក្នុងអត្ថបទទាំងអស់នេះមានកន្លែងខ្លះអាចនឹងធ្វើឱ្យអ្នកខ្លះមានភាពឈឺចាប់ ប៉ុន្តែទាំងនោះវាសុទ្ធតែកើតចេញពីទឹកចិត្តឈឺ ឆ្អាល និង ចង់ផ្លាស់ប្ដូរនូវចិត្តអាត្មានិយមដ៏សែនងងឹតរបស់បងប្អូនប្រជាពលរដ្ឋនៅក្នុងសង្គមនេះតែប៉ុណ្ណោះ។ហើយខ្ញុំស្វាគមន៍ជានិច្ចរាល់មតិរិះគន់របស់មិត្តអ្នកអានដើម្បីឱ្យខ្ញុំអាចកែលម្អឱ្យសៀវភៅមួយក្បាលនេះកាន់តែល្អ និង បានទៅជាប្រយោជន៍ដល់មនុស្សដែលបានចាប់កាន់វានៅក្នុងដៃ៕