«បដិបត្តិ» មានទំនាក់ទំនងផ្ទាល់ជាមួយនឹង «បញ្ញា» ។ បដិបត្តិគឺជាការយកចំណេះដឹងមកប្រើជាប្រយោជន៍ត្រង់ៗ ចំណែកឯបញ្ញាជាការបដិ-បត្តិចំណេះដឹងឱ្យចំកន្លែង ចំមនុស្ស ចំឱកាស និងចំពេលប្រកបដោយគុណធម៌ ដើម្បីទទួលបានជោគជ័យទៅតាមបំណងប្រាថ្នា។ ការទំនាក់ទំនងគ្នានេះមានន័យថា បុគ្គលដែលមានបញ្ញារមែងក្លាយជាអ្នកគិតបែបបដិបត្តិដែលក្លាយទៅជាអ្នកគិតបែបបដិបត្តិដែលប្រកបដោយគុណធម៌នោះឯង។
ការអនុវត្តផ្តល់ភាពសំខាន់ចំពោះការយករបស់អ្វីមួយមកប្រើក្នុងផ្នែកបដិបត្តិបានយ៉ាងសក្ដិសម។ ការបដិបត្តិអាចញែកអ្នកដែលមានត្រឹមតែ «ចំណេះដឹង» ឱ្យក្លាយជាអ្នកដែលមានទាំង «ចំណេះដឹងនិងសមត្ថភាព» ព្រោះចំណេះដឹងនឹងគ្មានប្រយោជន៍អ្វីឡើយ ប្រសិនបើអ្នកដែលមានចំណេះដឹងនោះគ្មានសមត្ថភាពក្នុងការនាំយកចំណេះដឹងទៅប្រើឱ្យបានសមរម្យនៅក្នុងពិភពនៃការពិត ដូចពាក្យថា «ចំណេះដឹងពេញខ្លួនតែយករួចខ្លួនមិនបាន»។
ការគិតបែបបដិបត្តិគឺជាការគិតក្នុងទស្សនៈមួយទៀត ដែលមនុស្សគ្រប់ជាន់ថ្នាក់នៅក្នុងសង្គមគួរតែសិក្សាវិធីគិតក្នុងចំណោមសៀវភៅឈុត «គំនិតឈ្នះទាំង១០» ដែលខ្ញុំបានលើកយកវិធីការគិតទាំង ១០ គំនិត នឹងជួយអភិវឌ្ឍមនុស្សនៅក្នុងសង្គមឱ្យ «ចេះគិត» នៅក្នុងទស្សនៈនៃការគិតបែបបដិបត្តិមួយនេះ ដោយមានបំណងឱ្យមិត្តអ្នកអានអាចអភិវឌ្ឍខ្លួនឯងឱ្យក្លាយទៅជា «អ្នកគិតបែបបដិបត្តិ» បាន។ ចាប់ផ្តើមពីការអភិវឌ្ឍសមត្ថ-ភាពក្នុងការនាំយកចំណេះដឹងដែលមានទៅប្រើជាប្រយោជន៍នៅក្នុងផ្នែកបដិបត្តិ ការដោះស្រាយបញ្ហាបានយ៉ាងសមរម្យ និងការអភិវឌ្ឍសមត្ថភាពក្នុងការប្រើប្រាស់ប្រយោជន៍ពីអ្វីដែលមាន ដើម្បីបង្កើតនូវអ្វីដែលថ្មីៗឱ្យរីកចម្រើននិងកាន់តែមានភាពច្នៃប្រឌិតឡើង ដែលអាចជួយកាត់បន្ថយផលអាក្រក់ពីការធ្វើត្រាប់តាមគេ ឬធ្វើតាមដោយប្រាសចាកការកែច្នៃឱ្យបានសមរម្យ។
ការគិតបែបបដិបត្តិជាជំនាញដែលមានប្រយោជន៍យ៉ាងខ្លាំងព្រោះអាចយកទៅប្រើជាប្រយោជន៍ក្នុងជីវិតពិត មិនថាជាការដោះស្រាយបញ្ហាដែលកើតឡើងនៅក្នុងជីវិតប្រចាំថ្ងៃប៉ុណ្ណាទេ គឺជាការយកចំណេះដឹងនិងសមត្ថភាពដែលមានមកប្រើឱ្យបានសក្ដិសម និងជួយឱ្យយើងអាចច្នៃប្រឌិតនូវអ្វីដែលថ្មីៗដែលអាចប្រើការបានបន្ថែមទៀតជាច្រើន។ ដូច្នេះការអភិវឌ្ឍជំនាញការគិតបែបបដិបត្តិសក្ដិសមសម្រាប់គ្រប់ក្រុមមនុស្ស គ្រប់ភេទ និងគ្រប់វ័យជាទីបំផុត។
ប៉ុន្ដែអ្វីដែលសំខាន់ជាងនេះទៅទៀត ការអភិវឌ្ឍជំនាញការគិតបែបបដិបត្តិមានចំណែកជួយលើកតម្កើងសមត្ថភាពខាងបញ្ញា ព្រោះនឹងជួយឱ្យយើងអាចនាំយកចំណេះដឹងដែលមានទៅអនុវត្តប្រើប្រាស់ចំកន្លែង ចំមនុស្ស ចំពេល និងចំឱកាស តែប្រសិនបើបន្ថែមគុណធម៌ ចរិយាធម៌ចូលទៅជាមួយទៀតនោះ អាចរាប់ថាជាអ្នកគិតបែបបដិបត្តិដែលមានបញ្ញាពេញលេញតែម្តង។
