សៀវភៅ គោលការណ៍នារីសម័យថ្មី ជាសៀវភៅដែលបង្ហាញអំពីគោលការណ៍គ្រឹះសំខាន់ៗទាំង៥សម្រាប់ស្រ្តី ដោយគោលការណ៍ទាំងនោះផ្តើមពីពាក្យអង់គ្លេស W O M A N គឺ៖
- W: Wise Woman (នារីឈ្លាសវៃ)
- O: Optimistic Woman (នារីសុទិដ្ឋិនិយម)
- M: Mature Woman (នារីដែលមានភាពចាស់ទុំ)
- A: Ambitious Woman (នារីដែលមានមហិច្ឆតា)
- N: Noble Woman (នារីថ្លៃថ្នូរ)
គោលការណ៍នារីសម័យថ្មី មិនមែនជាសៀវភៅមួយក្បាលដែលនឹងមកបែងចែករវាងមនុស្សស្រីសម័យនេះ ឬមនុស្សស្រីសម័យមុនអ្វីឡើយ ព្រោះមនុស្សស្រីគ្រប់ៗរូបនៅគ្រប់សម័យកាលទាំងអស់សុទ្ធសឹងតែមានភាពខ្លាំងនិងលក្ខណសម្បត្តិដាច់ដោយឡែករៀងៗខ្លួន គ្រាន់តែមនុស្សស្រីសម័យនេះទទួលបានឱកាសច្រើនជាងមុនក្នុងការបង្ហាញនូវសក្តានុពលរបស់ខ្លួន។ គួរឱ្យសោកស្ដាយ ថ្វីដ្បិតតែសង្គមបានផ្ដល់នូវឱកាសច្រើនយ៉ាងណាក៏ដោយ ក៏ស្ត្រីមួយចំនួនហាក់មិនបានក្រសោបឱកាសទាំងនោះឱ្យជាប់ដើម្បីកសាងខ្លួនឯងឱ្យអស់ពីសមត្ថភាពឡើយ ហើយនៅពេលខ្លះ កម្អែលដែលបន្សល់ទុកពីផ្នត់គំនិតចាស់គំរឹលរបស់មនុស្សជំនាន់មុន ក៏បានបន្តដិតដាមរហូតមកដល់ស្ត្រីសម័យបច្ចុប្បន្ន។ អាស្រ័យហេតុដូច្នេះហើយ ទើបសៀវភៅ គោលការណ៍នារីសម័យថ្មី ត្រូវបានសរសេរនិងរៀបរៀងឡើងក្នុងគោលបំណងបំផុសគំនិតរបស់ស្ត្រីគ្រប់ៗរូបឱ្យស្គាល់ច្បាស់ជាងមុននូវសក្តានុពលរបស់ខ្លួន ហើយចេះប្រើសក្តានុពលទាំងនោះយ៉ាងពេញទំហឹងដើម្បីជួយខ្លួនឯងផង ស្ត្រីដទៃផង និងសង្គមជាតិទាំងមូលផង។
