ក្នុងអង្គភាពការងារ យើងមិនមែនខ្វះខាតមនុស្សដែលមកអង្គុយក្នុងតំណែងអ្នកដឹកនាំទេ តែខ្វះខាតមនុស្សដែលមានភាពជាអ្នកដឹកនាំ ដែលប្រកបដោយចិត្តសាស្ត្រក្នុងតំណែងអ្នកដឹកនាំច្រើនជាង។ ពាក្យសម្តីខាងលើ ជាការសរុបដែលខ្ញុំបានពីបទពិសោធនៃការដឹកនាំអង្គភាព ខ្ញុំយល់ថាការឡើងតំណែងដោយពិចារណាពីចំណេះដឹងសមត្ថភាព ជំនាញ និងបទពិសោធការងារ មិនគ្រប់គ្រាន់សម្រាប់ឱ្យបុគ្គលណាម្នាក់ឬជាការធានាឱ្យបុគ្គលណាម្នាក់មានសក្តានុពលក្នុងការដឹកនាំ ក្រុមការងារទៅកាន់គោលដៅបានប្រកបដោយថាមពលនោះទេ បើគេខ្វះការអភិវឌ្ឍភាពជាអ្នកដឹកនាំប្រកបដោយចិត្តសាស្ត្រដែលមានក្នុងខ្លួន។ អ្នកដឹកនាំមិនមែនជាបុគ្គលដែលតែងតាំងឡើងមកដើម្បីចាំចេញបញ្ជាឬចង្អុលតែម្យ៉ាងនោះទេ ប៉ុន្តែត្រូវតែងតាំងឡើងមកដើម្បីនាំផ្លូវ ចាំណែនាំបង្ហាត់មនុស្សឱ្យក្លាយជាមនុស្សមានគុណភាព”។ ដូច្នេះរឿងសំខាន់នោះគឺ បុគ្គលិកគ្រប់គ្នាគួរបានទទួលការអភិវឌ្ឍភាពជាអ្នកដឹកនាំក្នុងខ្លួន តាំងពីគេនៅជាបុគ្គលិកក្នុងកម្រិតប្រតិបត្តិការ ដើម្បីត្រៀមលក្ខណៈធ្វើជា អ្នកដឹកនាំ ក្នុងតំណែងដែលត្រូវដឹកនាំអ្នកដទៃបានយ៉ាងជោគជ័យ។
សៀវភៅមួយនេះចែកចេញជា៥ផ្នែក ចាប់ផ្តើមតាំងពីជំហានដំបូង គឺត្រៀមខ្លួន ត្រៀមចិត្ត មុន”ដឹកនាំ” ដើម្បីឱ្យដឹងថាអ្នកដឹកនាំជាអ្នកណា យើងនឹងធ្វើជាអ្នកដឹកនាំដ៏ល្អនិងសក្តិសមបានដោយរបៀបណា ជំហាន ទីពីរ ដឹងច្បាស់ត្រូវ”ដឹកនាំមនុស្ស” ដើម្បីឱ្យដឹងថាតួនាទីអ្នកដឹកនាំសំខាន់បំផុតគឺការដឹកនាំមនុស្សនិងការសាងមនុស្ស មិនមែនជាការប្រើមនុស្សឱ្យធ្វើការងារប៉ុណ្ណោះទេ ជំហានទីបី “អំណាច”ដែលមានកាន់តែច្រើនឡើង ត្រូវចេះប្រើ បើមិនអ៊ីចឹងទេ អំណាចនោះនឹងត្រឡប់មកបំផ្លាញខ្លួនឯង។ជំហានទីបួន ការដឹកនាំមនុស្សទៅកាន់គោលដៅត្រូវប្រើជំនាញភាពជាអ្នកដឹកនាំលើរឿងណាខ្លះ ដូចជា ការដឹកនាំតាមរយៈចក្ខុវិស័យ ការបែងចែកការងារ ការរៀបចំមនុស្សឱ្យធ្វើការ ការបង្វឹកក្រុមឱ្យរឹងមាំជាដើម ហើយជំហានទីប្រាំ ដែលជាជំហានសំខាន់បំផុត គឺការអភិវឌ្ឍខ្លួនក្នុងការដឹកនាំ ដោយការស្គាល់ខ្លួនឯង ដឹងថាគួរឆ្លើយតបស្ថានការណ៍ផ្សេងៗយ៉ាងម៉េចទើបសមរម្យ ហើយគួរកែលម្អខ្លួនយ៉ាងម៉េចដើម្បីក្លាយជាអ្នកដឹកនាំដែលសម្រេចជោគជ័យយូរអង្វែង។
