នាសម័យបច្ចុប្បន្ននេះ យើងតែងដឹងឮជាប្រចាំថា គ្រប់វិស័យផ្សេងៗសុទ្ធតែទាមទារចង់បានមនុស្សមានសម្បទា មានសមត្ថភាព។បុគ្គលប្រភេទនេះអាចគិតនិងដោះស្រាយបញ្ហាឬចាត់ចែងស្ថានការណ៏ផ្សេងៗបានដោយងាយស្រួល។ សម្រាប់ពួកគេទាំងនោះ រឿងលំបាកក៏នឹងក្លាយជាងាយស្រួល តែតាមស្ថានភាពជាក់ស្តែងសួរថា តើយើងពិតជាចាំបាច់ត្រូវការបុគ្គលប្រភេទនេះមែនឬ? ហើយថាតើបុគ្គលប្រភេទនេះគួរតែទទួលជោគជ័យគ្រប់ៗគ្នាពិតមែនឬ?
ក្នុងសម័យសង្គមជាក់ស្តែង យើងនៅតែឃើញនិងព្រមទទួលស្គាល់ថា មានបុគ្គលពោរពេញដោយសមត្ថភាព តែបែរជាប្រព្រឹត្តអំពើទុច្ចរិត មានមនុស្សពូកែជាច្រើនដែលខ្វះការអត់ធ្មត់ ខ្វះការពុះពារព្យាយាម ឬមានអ្នកកីឡាពោរពេញដោយទេពកោសល្យតែខ្វះការហ្វឹកហាត់ រួមទាំងមនុស្សពូកែៗជាច្រើនដែលបរាជ័យក្នុងជីវិត ព្រោះសម្បទាឬភាពពូកែតែម្យ៉ាងនៅមិនទាន់គ្រប់គ្រាន់នោះឯង។
ទោះបីសម្បទាលើផ្នែកណាមួយជាកត្តាសំខាន់សម្រាប់ជោគជ័យ តែនៅមានកត្តាចាំបាច់ផ្សេងៗទៀតដែលត្រូវយកមកបំពេញលើសម្បទានោះដូចជា ភាពជឿជាក់ គោលដៅជាក់លាក់ និងការហ្វឹកហាត់ជាដើម។ សៀវភៅ ”ត្រឹមតែពូកែមិនគ្រប់គ្រាន់ទេ”ផ្ទុកទៅដោយគោលការណ៏សំខាន់ 13 ប្រការ ផ្តល់ជាគំនិតនិងកម្លាំងចិត្តជួយឲ្យលោកអ្នកឆ្លងផុតពីអ្វីដែលហៅថា “ត្រឹមតែពូកែ”ឆ្ពោះទៅរកជោគជ័យអស់ពីសក្តានុពលរបស់ខ្លួន។ ម្យ៉ាងទៀត យើងខ្ញុំក៏សូមអរគុណប្រិយមិត្តអ្នកអានដែលជួយគាំទ្រសៀវភៅម៉ាញប៊ុក្សយើងរហូតមកដល់ពេលនេះ។
មាតិកា:
តើពេលណាទៅដែលថាត្រឹមតែពូកែមិនគ្រប់គ្រាន់ទេនោះ?
- ភាពជឿជាក់ ជួយលើកកម្ពស់ភាពពូកែរបស់អ្នក
- ជំនក់ចិត្ត ជួយជម្រុញភាពពូកែរបស់អ្នក
- ការចាប់ផ្តើមប្រតិបត្តិ ជួយឲ្យភាពពូកែរបស់អ្នកបានធ្វើការ
- ការមានគោលដៅជាក់លាក់ ជួយកំណត់ទិសដៅដល់ភាពពូកែរបស់អ្នក
- ការត្រៀមខ្លួន ជួយឲ្យភាពពូកែស្ថិតនៅចំតំណែងល្អ
- ការហ្វឹកហាត់ ជួយឲ្យភាពពូកែរបស់អ្នកកាន់តែមុតស្រួច
- ការមិនចុះញ៉ម ជួយរក្សាភាពពូកែរបស់អ្នកឲ្យនៅគង់វង្សបន្តទៅមុខ
- សេចក្តីក្លាហាន ជួយសាកពិសោធពីភាពពូកែរបស់អ្នក
- ការស្ទះស្វែងរៀនសូត្រ ជួយឲ្យភាពពូកែរបស់អ្នកកាន់តែទូលំទូលាយ
- អត្តចរិតល្អ ជួយការពារភាពពូកែរបស់អ្នក
- សម្ពន្ធភាពជាមួយអ្នកដទៃ មានឥទ្ធិពលចំពោះភាពពូកែរបស់អ្នក
- ការទទួលខុសត្រូវ ជួយឲ្យភាពពូកែរបស់អ្នករឹងមាំកាន់តែខ្លាំង
- ការធ្វើការជាធីមវើក ជួយបង្កើនភាពពូកែរបស់អ្នកទេ្វដង
