សៀវភៅ «ទម្រាំក្លាយជាអ្នកនិពន្ធ» សរសេរចេញពីបទពិសោធន៌លើការតែងនិពន្ធជាង ២០ឆ្នាំ
ផ្តើមក្លាយជាអ្នកនិពន្ធតាំងពីអាយុ ១៨ ឆ្នាំ អ្នកស្រី ម៉ីសន សុធារី និពន្ធប្រលោមលោក និងរឿងសម្រាប់ភាពយន្ត អត្ថបទល្ខោននិយាយ និង បទយកការណ៍ រាប់រយចំណងជើង តាំងពីការងាររបស់ខ្លួនមិនទាន់មានតម្លៃ រហូតក្លាយជាអ្នកនិពន្ធអាជីពម្នាក់ ផ្តោតសំខាន់តែលើការតែងនិពន្ធ។
ដើម្បីឆ្លើយតបនឹងការចង់បានរបស់យុវវ័យជំនាន់ក្រោយដែលទទូចចង់ដឹងវិធីក្លាយជាអ្នកនិពន្ធ សៀវភៅ «ទម្រាំក្លាយជាអ្នកនិពន្ធ» ក៏បានបង្កើតឡើងក្នុងរយៈពេលខ្លី តែស្រង់យកចំណេះវិជ្ជាជាង ២០ ឆ្នាំមកផ្ទុកក្នុងកូនសៀវភៅទំហំតូចប៉ុនបាតដៃ ដែលអាចអានម្តងហើយម្តងទៀត ឬក៏ទុកជារូបមន្តជំរុញទឹកចិត្ត ឬទុកជាកម្លាំងបណ្តាលចិត្តឱ្យក្លាយជាអ្នកនិពន្ធ។ នេះបើយោងតាមខ្លឹមសារសង្ខេបពីសៀវភៅ «ទម្រាំក្លាយជាអ្នកនិពន្ធ»។
ការងារតែងនិពន្ធជាសិល្បៈមួយត្រូវការការអំណត់អត់ធ្មត់ ស្រាវជ្រាវ និងមានទេពកោសល្យពិព័ណ៌នាជាយានឈានរកការតែងនិពន្ធថ្មីដោយមានទស្សនៈ និងគុណធម៌ ដើម្បីជាពុទ្ធិសម្រាប់អ្នកអាន។ ជាក់ស្តែងអ្នកអានមិនប្រាកដ នឹងក្លាយជាអ្នកនិពន្ធនោះទេ តែអ្នកនិពន្ធគ្រប់គ្នាគឺសុទ្ធតែចូលចិត្តអាន ហើយមិនអានតែរឿងរបស់ខ្លួនទេ គឺអាចរឿងគ្រប់ប្រភេទ ហើយបើយោងតាមឃ្លាខ្លីមានន័យសមញ្ញមួយរបស់អ្នកស្រី ម៉ីសន សុធារី «ខ្ញុំអានដើម្បីហ្វឺតហាត់ ខ្ញុំមើលកីឡាជាការកម្សាន្ត»។
