សៀវភៅ“ទុកផ្លូវក្រោយ” គឺជាកម្រងសម្រង់អត្ថបទជាច្រើនដែលអ្នកនិពន្ធបានវិភាគយ៉ាងស៊ីជម្រៅនូវរឿងរ៉ាវប្រវត្តិសាស្ត្រចិនបុរាណ ដែលមានខ្លឹមសារ ពាក់ព័ន្ធទៅនឹងយុទ្ធសាស្ត្រគំនិត និងវិធីដោះស្រាយផ្លូវទ័លនៃបដិវាទកម្មតាម ស្ថានភាពនៃរឿងទាំងនោះយកមកបង្ហាញដល់អ្នកអានដោយសង្ខេប ដើម្បីយល់ពីដំណោះស្រាយទៅតាមមនោគតិនិងមគ្គុទ្ទេសក៍របស់អ្នកនិពន្ធដោយផ្ទាល់។
ដូចអ្វីដែលអ្នកនិពន្ធ បានថ្លែងនៅក្នុងអារម្ភកថារបស់អ្នកនិពន្ធអ៊ីចឹងថាសៀវភៅ “ទុកផ្លូវក្រោយ” គឺពុំមានចេតនាបង្រៀនមនុស្សឱ្យប្រព្រឹត្តិអំពើអាក្រក់ ប្រើល្បិចកលដាក់គ្នា ឬចុះចាញ់សត្រូវដោយមិនហ៊ានងើបឡើងប្រយុទ្ធនោះទេ។ ផ្ទុយទៅវិញចង់បង្ហាញមនុស្សឱ្យចេះរកវិធីសាស្ត្រដើម្បីអាចការពារខ្លួន និងអាចយកឈ្នះលើគ្រប់បញ្ហានៃជីវិត ខណៈដែលប្រឈមនឹងឧបសគ្គដោយចំពោះមុខពុំបានត្រៀមលក្ខណៈជាមុន។ ពោលអត្ថន័យដោយសង្ខេបចំពោះ “ទុកផ្លូវក្រោយ” មិនខុសអ្វីពីដែលទស្សនវិទូលោកបានពោលទុកមកហើយគឺ “គិតជ្រៅផ្លូវឈ្នះ” នោះទេ។ ចំពោះអ្នកដែលមិនបានត្រៀមខ្លួនជាមុននឹងត្រូវទទួលបរាជ័យ ឬស្លាប់បាត់បង់ជីវិត។
ដូច្នេះហើយ ដើម្បីរួមចំណែកចែករំលែកជាវិភាគទានគំនិតដល់ពលរដ្ឋខ្មែរយើង អ្នកនិពន្ធនិងគ្រឹះស្ថានបោះពុម្ពឯកសារខ្មែរ បានរៀបចំសហការគ្នាដើម្បីបោះពុម្ពផ្សាយសៀវភៅ “ទុកផ្លូវក្រោយ” នេះជូនជាសាធារណៈសម្រាប់ឆ្លើយតបនឹងតម្រូវការគាំទ្ររបស់ប្រិយមិត្តអ្នកអាន។ ទាំងអស់នេះ គឺស្ដែងឱ្យឃើញពីឆន្ទៈនិងសេចក្ដីព្យាយាមរបស់អ្នកនិពន្ធ ក្នុងបុព្វហេតុនៃវប្បធម៌ចែករំលែកចំណេះដឹង ពិសេសស្ដែងចេញជាសញ្ញាណវិជ្ជមានមួយ ក្នុងកិច្ចការស្រាវជ្រាវរបស់អ្នកចេះដឹងខ្មែរនៅជំនាន់នេះផងដែរ៕
