កូនសម្លាញ់…ថៅកែល្អ«ត្រូវមានអព្ភន្តរញាណ»។ គេនិយាយថា ដំណាក់កាលដំបូងដែលឈានទៅជាថៅកែនោះ គឺកូនត្រូវតែឈ្លាសវៃ ក្នុងការគិត និងក្នុងការសម្រេចចិត្ត រួមទាំងឈ្លាសវៃក្នុងការដោះស្រាយ បញ្ហាផ្សេងៗបានយ៉ាងត្រឹមត្រូវនិងសមរម្យ។
ការដែលអាចក្លាយទៅជាថៅកែដ៏ល្អនោះ កូនត្រូវចេះសួរសំណួរ ចំពោះខ្លួនឯងជានិច្ច ដើម្បីឱ្យខួរក្បាលបានគ្រប់គ្រងនិងប្រើអព្ភន្តរញាណ យ៉ាងមានប្រសិទ្ធភាពហើយអាចស្វែងរកចម្លើយផ្សេងៗបានរហ័ស។
ចូរសិក្សាអំពីកំហុសឆ្គង ពេលដែលត្រូវទទួលខុសត្រូវលើការងារ គ្រប់គ្រង។ ជម្រើសដែលងាយបំផុតគឺធ្វើនូវរឿងអ្វីដែលគេរំពឹងឱ្យធ្វើ។ បើកូនគឺជាមនុស្សថ្មីសម្រាប់ការងារនេះ អ្នកដទៃតែងតែយល់ច្បាស់ថា ត្រូវការពេលវេលាសម្រាប់សិក្សា ប៉ុន្តែកូនអាចសិក្សាពីកំហុសឆ្គងរបស់ ខ្លួនឯងបាន និងផ្តល់ពេលឱ្យច្រើនបំផុតតាមដែលអាចផ្តល់ទៅបានដល់ ការងារបន្ទាប់ៗទៀត ដែលអាចធ្វើឱ្យប្រសើរជាងមុនបាន។
ប្រសិនបើកូនហ៊ានគិតហ៊ានធ្វើ កូននឹងអាចផ្លាស់ប្តូរអ្វីផ្សេងៗបាន កូនអាចធ្វើអ្វីដែលប្លែកៗបាន។ សុំត្រឹមតែកូនកុំរាថយឱ្យសោះ គ្រាន់តែ ប៉ុណ្ណឹង ភាពជោគជ័យប្រាកដជាមករកកូនជាក់ជាមិនខាន។
