ព្រះនាងមុខមួយពាន់ និងគ្រោះទាំង៧ ដែលបានដំណើរការណ៍ផលិតអស់រយៈពេល១ឆ្នាំ។ នេះជាស្នាដៃថ្មីប្លែក ដែលយើងបានជ្រើសរើសយកដំណើរសាច់រឿងប្រភេទព្រេងនិទានខ្មែរ និងប្រភេទទេវកថា ដែលសឹងតែត្រូវបានបំភ្លេចចោលទៅហើយ។ យើងបានលើកយកវាមកបង្ហាញសាជាថ្មី នៅក្នុងរូបភាពថ្មីមួយទៀត ព្រមទាំងច្របាច់បញ្ចូលសីលវិធី និងគំនិតច្នៃប្រតិដ្ឋថ្មីទៅតាមសម័យកាល និងវិវឌ្ឍនៈនៃអក្សរសិល្ប៍ខ្មែរ។ យើងសង្ឃឹមថា វានឹងធ្វើឲ្យអ្នកបានទទួលនូវបទពិសោធន៍អំណានដ៏ថ្មីស្រឡាងមួយ។
តាំងពីតូចដល់ធំ យើងតែងតែបានឮព្រេងនិទានដែលនិយាយពីយក្ស និងមនុស្ស។ យក្សត្រូវបានចាត់ទុកថាជាសភាវៈអាក្រក់ ឯមនុស្សជាសភាវៈល្អ។ ពួកគេទាំងពីរជាសត្រូវនឹងគ្នាតាំងពីដើមមក។ ក្នុងសៀវភៅមួយក្បាលនេះ យើងនឹងកកាយយ៉ាងលម្អិតពីរឿងរ៉ាវនៃអម្បូរទាំងពីរ។
សង្ខេបសាច់រឿង៖
កាលពីយូរលង់ណាស់មកហើយ មានហេតុចម្លែកមួយបានកើតលើព្រះរាជធីតាមួយអង្គ។ បន្ទាប់ពីទ្រង់បានប្រសូត ព្រះធីតាតែងផ្លាស់ប្ដូរព្រះភក្ត្រជារៀងរាល់ថ្ងៃ ក្នុងរយៈពេលមួយពាន់ថ្ងៃដំបូងយ៉ាងចម្លែក។
តាំងពីកុមារភាព ដល់ចម្រើនពេញវ័យ ទ្រង់ត្រូវរស់នៅជាមួយអាថ៌កំបាំងនៃការផ្លាស់ប្ដូរព្រះភក្ត្ររបស់ទ្រង់ ព្រមទាំងការបាត់ព្រះកាយរបស់ព្រះមាតាទៀតផង។ លើសពីនោះ ជីវិតព្រះនគរទាំងមូល ក៏កំពុងតែជួបប្រទះនូវទំនាយដ៏អាក្រក់នៃគ្រោះទាំង៧ដ៏សាហាវ ដែលជាស្នាដៃឥតមេត្តាពីនគរយក្ស ដើម្បីសម្លាប់មនុស្សឲ្យផុតពូជពីផែនដីនេះ។
អ្នកនិពន្ធ
លោក ម៉ានិត
