ភ្នែកមើល ត្រចៀកស្ដាប់ ខួរក្បាលទិញ ដៃចាយវាយ

យល់ដឹងពីថាមពលអាថ៌កំបាំងដែលជំរុញឲ្យអ្នកដកលុយពីហោប៉ៅទិញផលិតផលដោយមិនដឹងខ្លួន
តាមពិតទៅ ការទិញផលិតផល គឺជាទម្លាប់ម្យ៉ាងច្រើនជាងការសម្រេចចិត្តដោយហេតុផល។ សាកមើលឡេការពារស្បែកក៏បាន បណ្ដាឡេលុបបំបាត់ស្នាមជ្រីវជ្រួញដែលព្យាយាមទាក់ទាញមនុស្សស្រីគ្រប់គ្នា (បច្ចុប្បន្នក៏ទាក់ទាញមនុស្សប្រុសផងដែរ) ប្រើបានផលឬអត់។ អ្នកប្រើប្រាស់ភេទស្រីភាគច្រើនក្នុងការងារស្រាវជ្រាវរបស់ខ្ញុំបានទទួលស្គាល់ថា ឡេលុបបំបាត់ស្នាមជ្រីវជ្រួញគ្មានប្រយោជន៍អ្វីទេ តែពួកនាងនៅចូលទៅក្នុងហាងដើម្បីទិញឡេថ្មីៗដែលទើបតែចេញថ្មី ដោយជ្រើសរើសតែម៉ាកដែលទទួលការពេញនិយមខ្លាំងបំផុត។ ទង្វើរបស់ពួកនាងមានបែបផែនដែលស្មានដឹងបានដោយងាយ។ ២-៣ អាទិត្យក្រោយមក ពួកនាងក៏មានអារម្មណ៍ខកបំណង ពួកគេគិតថាឡេដែលទិញមកប្រើមិនបានផល ហើយចេញទៅរកមើលផលិតផលថ្មីផ្សេងៗទៀត។ ហេតុអ្វីទៅ? ព្រោះវាជាទម្លាប់ដែលពួកនាងប្រកាន់ខ្ជាប់តាំងពីណាពីណីមក​.