ឥទ្ធិពលខាងសេដ្ឋកិច្ចរបស់ចិនក្នុងសម័យនេះបានផ្សព្វផ្សាយទៅឆ្ងាយគ្រប់ភូមិភាគទាំងអស់របស់ពិភពលោក ជាពិសេសក្នុងអាស៊ាន ទាំងផ្នែកពាណិជ្ជកម្ម ការវិនិយោគ ហិរញ្ញវត្ថុ សេវាកម្ម រួមទាំងផ្នែកទេសចរណ៍ផងដែរ។
ប្រការដែលសំខាន់ តួនាទីនិងអំណាចខាងសេដ្ឋកិច្ចរបស់ចិនមានកម្លាំងខ្លាំងក្លាសម្បើមណាស់ ហើយគ្មាននិន្នាការថានឹងខ្សោយកម្លាំង ឬថមថយកម្លាំងដោយងាយនោះទេ ដូច្នេះយើងមិនស្គាល់ចិនមិនបានឡើយ។ សម្រាប់អ្នកដែលចូលចិត្តចិនចាំបាច់ត្រូវមើលចិនឱ្យធ្លុះគ្រប់ផ្នែកនិងគប្បីមានសតិក្នុងការសេពគប់ឬធ្វើជំនួញជាមួយចិន ចំណែកក្រុមដែលមិនចូលចិត្តចិនក៏កាន់តែត្រូវស្គាល់ចិនដើម្បីឱ្យដឹងទាន់ចិន អាចទប់ទល់នឹងចិនបាន ក្នុងគ្រាចាំបាច់។ ដូច្នេះមិនថាអ្នកចូលចិត្តឬមិនចូលចិត្តចិនក៏ដោយចាំបាច់ត្រូវស្គាល់ចិននិងតាមដានមើលការផ្លាស់ប្តូរលើផ្នែកផ្សេងៗរបស់ចិន។
សៀវភៅ—Eyes on China មើលឱ្យធ្លុះគ្រប់ផ្នែកអំពីមហាអំណាចចិនដែលនៅក្នុងដៃរបស់អ្នកមួយក្បាលនេះ យើងខ្ញុំសន្មតថាជាឧបករណ៍មួយធ្វើឱ្យអ្នកស្គាល់ពីចិនដើម្បីយល់ដឹងនិងស្គាល់ចិនលើផ្នែកជាច្រើនទៀត។ដោយការខិតខំចេញពីចិត្តបរិសុទ្ធក្នុងការប្រែសម្រួល ចងក្រង និងរៀបរៀងសៀវភៅមួយក្បាលនេះ យើងខ្ញុំសូមលើកបុណ្យនេះជូនដល់បុព្វការីរបស់មិត្តអ្នកអានក៏ដូចជាបុព្វការីរបស់យើងខ្ញុំផងដែរឱ្យជួបតែសេចក្ដីសុខគ្រប់ប្រការកុំបីអាក់ខានឡើយ ជាពិសេសអ្នកស្នេហាជាតិខ្មែរទាំងអស់។
