ហេតុដើមដែលនំាឱ្យយើងខ្ញុំមានសតិសម្បជញ្ញៈរៀបរៀងនូវ ឯកសារលទ្ធិប្រជាធិបតេយ្យ និងការបែងចែកអំណាចនេះឡើង គឺដោយយើងខ្ញុំយល់ថា រូបរបស់យើងខ្ញុំក៏មិនប្លែកអ្វីអំពីពលរដ្ឋឯទៀតសុទ្ធតែមានឧត្តមគតិចង់ឱ្យលទ្ធិប្រជាធិបតេយ្យពិតៗ បានស្ថាបនាឡើង ទុកជាមាគ៌ាសម្រាប់រដ្ឋកម្ពុជាដើម្បីស្រោចស្រង់ជីវភាព មនុស្សជាតិឱ្យរស់នៅដោយសុចរិត យុត្តិធម៌ និងសម្បូណ៌សប្បាយ ដោយស្របតាមឧត្តមគតិនៃពលរដ្ឋ។
ដោយឡែក លទ្ធិនេះទៀតច្រើនមានជនជំពូកខ្លះឃោសនាបំប្លែងឱ្យយើងវង្វេងភាន់ផង បានជាយើងខ្ញុំរៀបរៀងនូវឯកសារនេះឡើង សម្រាប់ជួយបំពេញថែមដល់មនោសញ្ចេតនានៃពលរដ្ឋឱ្យបានយល់មាគ៌ាប្រជាធិបតេយ្យពិតៗ។
យើងខ្ញុំនឹកសង្ឃឹមថា បើមានការខ្វះខាតដោយអត្ថន័យក្នុងផ្ទៃនៃឯកសាររបស់យើងៗមុខជានឹងបានទទួលនៅយោបល់ទិតៀនអំពីសំណាក់អស់លោកមិត្រភក្តិអ្នកអានដោយសុទ្ធចិត្ត ដើម្បីកសាងឯកសារ (លទ្ធិប្រជាធិបតេយ្យ និងការបែងចែកអំណាច) ក៏ដូចជាស្នាដៃដទៃទៀតរបស់ក្រុមយើងខ្ញុំ (ក្រុមបណ្ដុះគំនិតកូនខ្មែរឱ្យស្នេហ៍ការអាន) ឱ្យបានថ្លៃថ្នូរបរិបូណ៌ទំាងខាងទិចនិច និងអត្ថន័យជាងនេះទៀត។
