សៀវភៅ វាចាមាសរបស់ម៉ែ គឺជាស្នាដៃថ្មីមួយរបស់អ្នកនិពន្ធ ឆិម ប៊ុនឆា ។ អ្នកនិពន្ធប្រមូលផ្ដុំនូវគំនិត បទពិសោធ និងបំនិនជីវិតនានា ដែលអ្នកម្ដាយគ្រប់រូបតែងប្រដៅណែនាំកូនៗជារៀងរាល់ថ្ងៃ យកមកចងក្រងក្នុងសៀវភៅមួយនេះ សម្រាប់មិត្តអ្នកអាន។
“កូនមានដែលអន់ចិត្តទេ ដែលកូនកេីតមកនៅក្នុងត្រកូលអ្នកស្រែ? កូនដែលគិតថាខ្មាសគេទេ ដែលកូនកេីតមកចំម៉ែអ្នកក្រ? ម៉ែមិនមានលុយទិញរបស់ល្អៗប្រេនៗឱ្យកូន តែម៉ែមានសេចក្ដីស្រឡាញ់ពិតប្រាកដមិនលាក់ពុតប្រគល់ឱ្យកូន ម៉ែសុខចិត្តងងឹតក្នុងបច្ចុប្បន្ន តែម៉ែចង់ឱ្យអនាគតរបស់កូនបានភ្លឺស្វាង ម៉ែសុខចិត្តនឿយហត់រាល់ថ្ងៃ តែម៉ែចង់ឱ្យថ្ងៃមុខកូនបានសុខស្រួល…។
ខ្លួនប្រាណរបស់ម៉ែអាចមិនស្អាត សម្លៀកបំពាក់របស់ម៉ែអាចមិនល្អ កាយវិការរបស់ម៉ែអាចមិនទន់ភ្លន់ តែបេះដូងរបស់ម៉ែស្អាតល្អ និងទន់ភ្លន់ជានិច្ច ចំពោះកូន សម្តីរបស់ម៉ែអាចមិនពីរោះ ដូចម៉ែគេដទៃ ជេរស្តីប្រដៅព្រឹកល្ងាច តែអ្វីដែលម៉ែនិយាយម៉ែស្តីម៉ែថាគឺម៉ែចង់ឱ្យកូនល្អ។ ម៉ែមិនចេះផ្អែមល្ហែមជាមួយកូន តែម៉ែមិនដែលលាក់ពុតអ្វីជាមួយកូនឡេីយ កូនខុសថាខុស កូនត្រូវថាត្រូវ…ធាតុពិតរបស់ម៉ែគឺអ៊ីចឹង…។”
