“វិធីសាស្រ្តប្រមាញ់ការងារ” ត្រូវបានរួមផ្សំដោយជំហានសំខាន់ៗ ៣ គឺ វិធីសាស្រ្តស្វែងរកការងារ វិធីសាស្រ្តសរសេរពាក្យស្នើសុំការងារ និងវិធីសាស្រ្តសម្ភាសការងារ។ ខ្ញុំក៏រៀបរាប់បានលំអិតគួរសម នូវដំណើរការនៃជំហាននីមួយៗ ជាវិធីសាស្រ្តអនុវត្តន៍ ក្នុងបំណងបង្កើនប្រសិទ្ធភាពដើម្បីទទួលបានការងារមួយដែលខ្លួនស្រលាញ់ពេញចិត្តបំផុត។ ក្នុងសៀវភៅដែលមានកម្រាស់ជាង១៦០ទំព័រនេះ ក៏បានរំលេចនូវចំនុចសំខាន់ពីរផងដែរ គឺទី១ សារៈសំខាន់នៃការរៀបចំខ្លួនជាមុន ដោយខ្ញុំយល់ថា ការស្វែងរកការងារដោយបានរៀបចំខ្លួនជាមុន មានប្រសិទ្ធភាពជាងការស្វះស្វែងដោយគ្មានដឹងរបៀប និងមិនបានរៀបចំ។ ហើយចំនុចសំខាន់ទី២ គឺការស្វែងរកការងារត្រូវប្រកាន់នូវគំនិតមួយ គឺ “មិនមែនគ្រាន់តែលក់អ្វី ដែលអ្នកមាននោះទេ គឺអ្នកត្រូវលក់អ្វីដែលអ្នកទិញត្រូវការ”។
អំពីអ្នកនិពន្ធ
លោក ឈុំ សីហា ជាអ្នកនិពន្ធនិងរៀបរៀងសៀវភៅជាច្រើនក្បាល ដែលមានសៀវភៅពាក់ព័ន្ធនឹងជីវប្រវត្តិដូចជា មេដឹកនាំពិភពលោក២១រូប ស្ត្រីដែកថែម មហាសេដ្ឋីព័ត៍មានវិទ្យា និងសៀវភៅពាក់ព័ន្ធគំនិតទស្សនៈ ការងារ និងការជំរុញទឹកចិត្តជាច្រើន។
លោកបានបញ្ចប់ការសិក្សាថ្នាក់បរិញ្ញបត្រជាន់ខ្ពស់គ្រប់គ្រងពាណិជ្ជកម្ម ឯកទេសគ្រប់គ្រងធនធានមនុស្ស ក្នុងឆ្នាំ 2011 និងបានបំពេញកិច្ចការផ្នែកនេះរយៈពេល 10 ឆ្នាំ។ លោកបានចាប់ផ្តើមអាជីព ជាសាស្ត្រចារ្យបង្រៀនមុខវិជ្ជាគ្រប់គ្រងពាណិជ្ជកម្ម ចាប់ពីឆ្នាំ 2009 និងវបានសរសេរសៀវភៅជាច្រើនក្បាលទៀតផង។
បច្ចុប្បន្ន លោកក៏ជាសហស្ថាបនិកក្រុមបោះពុម្ពផ្សាយហាតប៊ុក និងជាប្រធានផ្នែកធនធានមនុស្ស និងប្រតិបត្តិការ នៅក្រុមហ៊ុនឯកជនមួយនៅ រាជធានីភ្នំពេញ។
