[…] រឿងកុលាបប៉ៃលិន អាចចាត់ទុកជាស្នាដៃអក្សរសិល្ប៍តថនិយម ព្រោះបានលើកឡើងពីបញ្ហាជីវិតក្រីក្រតោកយ៉ាក និងការតស៊ូដើម្បីកែច្នៃជីវិតរបស់ខ្លួនឱ្យបានប្រសើរឡើង។ បើទោះបីអ្នកនិពន្ធបានទទួលឥទ្ធិពលយ៉ាងជ្រៅពីលទ្ធិពុទ្ធសាសនាក៏ដោយ ក៏សកម្មភាពនៃតួអង្គក្នុងរឿងបានបំពេញ គឺលេចចេញមកពីគំនិតភ្ញាក់រលឹកការងារនិយម មិនដេកដួលទៅលើកម្មផលឬព្រេងវាសនានោះឡើយ។ សីលធម៌អប់រំរបស់លោក ញ៉ុក ថែម គឺ “ខ្លួនទីពឹងខ្លួន” ដែលតម្រូវឱ្យមានជម្រើសមួយដ៏ត្រឹមត្រូវ សមស្របតាមសភាពការណ៍ជាក់ស្ដែង ដែលអ្នកនិពន្ធរូបនេះ នឹកភ្នកទៅដល់តំបន់ត្រួសត្រាយដីថ្មី ដើម្បីលើកទឹកចិត្តយុវវ័យឱ្យមានសេចក្ដីក្លាហានក្នុងបំលាស់ប្ដូរទីដោះស្រាយជីវភាពរស់នៅ ដោយមិនត្រូវរួញរានឹងឧបសគ្គគ្រប់បែបយ៉ាង ឱ្យតែតំបន់នោះឋិតនៅលើទឹកដីនៃមាតុភូមិរបស់ខ្លួន សមស្របតាមទិសស្លាកនៃសង្គមារម្មណ៍ខ្មែរ “ទឹកដីថ្មី ជីវិតថ្មី”។ […]
សៀវភៅ៖ សាកល្បងសិក្សារឿង កុលាបប៉ៃលិន
សិក្សានិងរៀបរៀងដោយ៖ បណ្ឌិតសាស្រ្តចារ្យ អ៊ីវ ថុង
