សៀវភៅមួយក្បាលនេះ មានប្រយោជន៍ជាខ្លាំងសម្រាប់អ្នកដឹកនាំគ្រប់ជាន់ថ្នាក់ គ្រប់វិស័យ ព្រមទាំងអ្នកដែលចង់ក្លាយជាអ្នកដឹកនាំ និងកំពុងតែក្លាយជាអ្នកដឹកនាំផងដែរ។
ព្រោះថាអ្នកដឹកនាំ គឺជាអ្នកសាងភាពខុសគ្នា ធ្វើឱ្យគ្រួសារ សង្គម ជីវភាពរស់នៅ អង្គភាព និងប្រទេសជាតិ មានភាពល្អប្រសើរឡើង។ អ្នកណាអាចធ្វើតួនាទីនេះបានល្អជាងអ្នកណានោះគឺ ត្រូវអាស្រ័យលើសមត្ថភាពជាអ្នកដឹកនាំ ដែលជាការអាចសិក្សានិងសាងឡើងដោយខ្លួនឯងបាន។ បើអ្នកដឹកនាំមានសមត្ថភាព រមែងតែអាចសាងស្នាដៃល្អៗបានជាច្រើន ធ្វើឱ្យអ្នកដែលដើរតាមនិងសង្គមដែលនៅជុំវិញខ្លួនបានទទួលប្រយោជន៍ផងដែរ។
ដូច្នោះហើយ ទើបសៀវភៅមួយក្បាលនេះ ជាសៀវភៅដែលសាងប្រយោជន៍ដល់មនុស្សគ្រប់ៗគ្នា។ សៀវភៅមួយក្បាលនេះ នឹងបង្រៀនជំនាញធ្វើជាអ្នកដឹកនាំដ៏ល្អ ដោយការបង្វឹកខ្លួនឯង ពីវិន័យមួយទៅវិន័យមួយទៀតយ៉ាងក្បោះក្បាយ។ ប្រសិនបើអ្នកតាំងចិត្តនិងអត់ធ្មត់នោះ វាមិនពិបាកអ្វីឡើយ គ្រាន់តែសុំឱ្យនឹកដល់ប្រយោជន៍ដែលអ្នកបានធ្វើ មនុស្សដែលអ្នកស្រលាញ់ និងមនុស្សដែលនៅជុំវិញខ្លួន នោះអ្នកនឹងបានទទួលពីការដឹកនាំដ៏ល្អរបស់អ្នក ហើយអ្នកនឹងមានកម្លាំងចិត្ត ហ្វឹកហាត់រហូតដល់ទទួលបានជោគជ័យ។
