សុភាសិតគឺជាតម្លៃនៃវប្បធម៌របស់មនុស្សជាតិ ដែលបន្តរាប់សិបជំនាន់។ អ្វីដែលធ្វើឱ្យសុភាសិតមានតម្លៃ គឺភាពខ្លឹម។ អ្វីជាភាពខ្លឹមរបស់សុភាសិត? ដូចអ្វីដែលអ្នកនិពន្ធអេស្ប៉ាញបានលើកឡើងអម្បាញ់មិញថា “សុភាសិតជាឃ្លាខ្លីៗ ដែលត្រូវបានបង្កើតឡើងដោយបទពិសោធន៍ដ៏វែង” ដែលនេះបង្ហាញអំពីការសម្រិតសម្រាំងនិងចម្រាញ់ជាច្រើនទឹក ច្រើនលើកច្រើនសារ និងប្រុងប្រយ័ត្នបំផុត មុនពេលទុកឱ្យកូនចៅជំនាន់ក្រោយ ឬមនុស្សជាតិជំនាន់ក្រោយសិក្សាស្វែងយល់។ ម្យ៉ាងវិញ សុភាសិតដែលមានលក្ខណៈខ្លីៗបែបនេះ គឺជាការបង្កឱកាសយ៉ាងល្អបំផុត សម្រាប់ឱ្យប្រិយមិត្តអ្នកអាន បានគិតត្រឹះរិះពិចារណាដោយខ្លួនឯងបានច្រើន ជាជាងការបទអត្ថាធិប្បាយនានា។
“សុភាសិតប្រាំបីទិស” គឺជាសៀវភៅនៃកម្រងសុភាសិតល្អៗនិងមានតម្លៃរបស់ពិភពលោក ដែលត្រូវបានដកស្រង់ពីបណ្តាសុភាសិតនៃបណ្តាប្រទេសនានាជាច្រើនក្នុងពិភពលោក។ ទោះបីក្នុងនាមជាមនុស្សជាតិតែមួយដូចគ្នាប៉ុន្តែដោយសារយើងមានជាតិសាសន៍ វប្បធម៌ និងសង្គមខុសគ្នា ដូចនេះការសិក្សាពីសុភាសិតដែលខុសៗគ្នា ពិតជាមានប្រយោជន៍ជាច្រើនសម្រាប់ផ្តល់ការពិចារណាដល់យើង។ អ្វីដែលពិសេសមួយទៀត គឺយើងខ្ញុំបានរក្សាទុកពាក្យជាភាសាអង់គ្លេសដែលជាប្រភពដើមដែលយើងខ្ញុំបានប្រែសម្រួល ដើម្បីគ្រាន់ជួយផ្ទៀងផ្ទាត់គ្នា ក្រែងលោខុសឆ្គងន័យ។
យើងខ្ញុំសង្ឃឹមម្តងទៀតថា សៀវភៅមួយក្បាលដែលប្រមូលផ្តុំដោយសុភាសិតរាប់រយនេះ នឹងជួយផ្តល់ជាគំនិតបន្ថែម ពីលើសុភាសិតខ្មែរជាច្រើន ដែលយើងធ្លាប់បានសិក្សារៀនសូត្រពីដើមមក។ ខ្ញុំសូមអភ័យទោសទុកជាមុន នូវរាល់កំហុសឆ្គងដែលកើតឡើង ទាំងអត្ថន័យនិងអក្ខរាវិរុទ្ធ និងចំណុចផ្សេងទៀត។
