សៀវភៅថ្មីមួយនេះបង្កើតឡើងដើម្បីបង្ហាញនិងបំភ្លឺរឿងមួយចំនួនដែលអ្នកខ្លះមិនទាន់បានដឹងច្បាស់ពីមុនមក ថាតើការរៀនមានតម្លៃប៉ុនណា? និងតើការមិនបានរៀនពីអ្វីទាំងអស់នឹងមានអ្វីកើតឡើង? មានពេលខ្លះទៀតនៅមិនទាន់ដឹងថា រៀនពីអ្វីមុននិងចាប់យកអ្វីខ្លះដើម្បីប្រើប្រាស់នៅក្នុងជីវិតប្រចាំថ្ងៃ ក៏ដូចជាថ្ងៃអនាគតនៅឡើយទេ។ ដូច្នេះហើយទើបបានជាខ្ញុំខិតខំផលិតសៀវភៅនេះឡើង(ហេតុអ្វីមនុស្សគួរតែរៀន?)ដើម្បីបង្ហាញផ្លូវដល់អ្នកទាំងអស់គ្នាឱ្យកាន់តែច្បាស់លាស់ឡើងថែមមួយកម្រិតទៀត។
មនុស្សមួយចំនួនធំបានយល់ពីតម្លៃនៃការសិក្សារួចហើយ ដោយឡែកទៀតនៅមានមនុស្សមួយចំនួនច្រើនគួរសមដែរ ដែលមិនឱ្យតម្លៃអ្នកសិក្សារៀនសូត្រនិងអ្នករៀនសូត្រ ដោយហេតុផលថា«តើរៀនហ្នឹងបានអ្វីមកវិញ?» និង «តើពេលណាទើបបានផលតបស្នង?» ទុកពេលធ្វើការងារ វិញនឹងឆាប់ទទួលបានផលបានផ្លែរហ័សជាងនេះ។ តាមពិតទៅ អ្នកដែលគិតបែបនេះ គឺជាអ្នកគិតខ្លីបំផុតនិងចង់បានតែរបស់កៀកដៃ មិនដែលរំពៃគិតនៅថ្ងៃអនាគតឡើយ។ មានពំនោលមួយពោលថា មនុស្សឆ្លាតគិតឆ្ងាយនិងដឹងពីលទ្ធផលពេលអនាគតច្បាស់លាស់។ ដូច្នេះអ្នកដែលគិតមិនឆ្ងាយគឺសុទ្ធតែជាមនុស្សល្ងង់មែនឬទេ?
ការពិតមិនមែនសុទ្ធតែជាមនុស្សល្ងង់ទេ គឺគ្រាន់តែពួកគាត់នៅមិនទាន់បានរៀន និងមិនទាន់បានដឹងអ្វីថ្មីៗដែលត្រូវរៀនបន្ថែមតែប៉ុណ្ណោះ។ប្រសិនបើពួកគាត់ខិតខំប្រឹងប្រែងរៀនសូត្រឡើងវិញ គឺពួកគាត់នឹងមានឱកាសដ៏ធំធេង។ ជាពិសេសនឹងក្លាយជាមនុស្សឆ្លាតវៃដូចជាមនុស្សអស្ចារ្យដទៃទៀតបាន។ មនុស្សយើងឈប់ល្ងង់នៅពេលដែលបានដឹង ហើយនៅពេលដែលចង់ដឹងគឺត្រូវតែរៀនបន្ថែម។
