មនុស្សភាគច្រើនតែងតែយល់ច្រឡំថាឲ្យតែមានប្រាក់គឺមានអ្វីៗទាំងអស់!… តាមពិតទៅថ្វីត្បិតតែប្រាក់ជារឿងសំខាន់ ប៉ុន្តែការចាស់មុនអាយុឬការទទួលរងទារុណ្ឌកម្មពីជំងឺមួយចំនួន មិនអាចយកប្រាក់ទៅទិញបានទេ។អ្វីទាំងនេះត្រូវប្រើពេលវេលា រួមទាំងការយល់ដឹងដ៏ចាំបាច់ក្នុងការថែទាំ។ ទោះបីសម័យនេះវិស័យសុខាភិបាលមានការរីកចម្រើនជឿនលឿនរួមទាំងការវះកាត់បង្កើនសម្រស់ ដែលធ្វើឲ្យមនុស្សមើលទៅឃើញល្អស្អាតដល់កម្រិតណាក៏ដោយ អ្វីទាំងនេះសុទ្ធតែប្ដូរដោយទឹកប្រាក់ដ៏ច្រើន រួមទាំង
ការប្រថុយ (អាចប្រថុយទាំងជីវិតទៀតផង) ឬជួនកាលក៏ស្អាតបានមួយរយៈ តែថ្ងៃក្រោយមកស្រាប់តែមានផលប៉ះពាល់ពីការវះកាត់ បែរជាធ្វើឲ្យកាន់តែអាក្រក់លើសដើមក៏មាន។
តើជាការល្អទេដែលយើងគួរងាកមកថែទាំសុខភាពឲ្យមាំមួន ស្រស់ថ្លា ដោយអនុវត្តតាមវិធីធម្មជាតិដូចជាការកម្ចាត់រ៉ាឌីកាល់សេរីដោយការបរិភោគអាហារដែលមានប្រយោជន៍ដល់សុខភាព ជាវិធីផ្ដល់ផលល្អ គ្មានការប្រថុយប្រថាន រួមទាំងប្រតិបត្តិតាមទម្លាប់ផ្សេងៗ ឲ្យជៀសឆ្ងាយពីរ៉ាឌីកាល់សេរីផងដែរ។ គ្រាន់តែប៉ុណ្ណេះសុខភាពរបស់អ្នកក៏នឹងបានល្អប្រសើរ និងមានរូបរាងមើលទៅក្មេងជាងវ័យបានទៅហើយ។
