អាចនិយាយបានថា «អ្នកគ្រប់គ្រងក្នុងពេលមួយនាទី» គឺជាសៀវភៅដ៏ល្អបំផុតមួយសម្រាប់អ្នកគ្រប់គ្រងទូទៅ ឬបងប្អូនដែលមានបំណងក្លាយជាអ្នកគ្រប់គ្រង។ សហអ្នកនិពន្ធពិតជាមានគំនិតឆ្នៃប្រតិដ្ឋខ្ពស់ ដោយសារមានភាពសាមញ្ញ និងងាយស្រួលយល់ ប៉ុន្តែបង្ហាញពីខ្លឹមសារច្បាស់ៗនិងមានប្រសិទ្ធភាពបំផុតមួយ។
យើងខ្ញុំសង្ឃឹមថា ការប្រែសម្រួលសៀវភៅបរទេស ដែលជាស្នាដៃរបស់អ្នកនិពន្ធអាម៉េរិកដ៏ល្បីល្បាញពីររូបនេះ នឹងចូលរួមចំណែកយ៉ាងច្រើនដល់សង្គមជាតិខ្មែរ នៅគ្រប់ស្ថាប័នទាំងអស់របស់យើងទាំងរដ្ឋនិងឯកជន។ បើអ្នកគ្រប់គ្រងអង្គភាពទាំងអស់នៅស្រុកខ្មែរ សុទ្ធតែបានអានសៀវភៅនេះ បានស្វែងយល់ និងចាប់បានខ្លឹមសារ ហើយឈានទៅដល់ការអនុវត្ត នោះពិតជាបង្កើតបានជាផ្លែផ្កាយ៉ាងច្រើនជូនអង្គភាពនិងសង្គមជាតិយើងមិនខាន។
