«អ្នកជាមនុស្សដ៏អស្ចារ្យបំផុត» ជាប្រភេទសៀវភៅលើកទឹកចិត្ត និងអភិវឌ្ឍខ្លួន ដែលបានបរិយាយអំពីគំនិត ទស្សនៈ និងការយល់ឃើញនានា ដោយផ្សារភ្ជាប់ជាមួយឧទាហរណ៍ជាក់ស្តែងកើតមានក្នុងសង្គមខ្មែរយើង។ រាល់ការរៀបរាប់ គឺក្នុងន័យបណ្តុះផ្នត់គំនិត ថាមពល ឆន្ទៈ ពេញចិត្តនូវអ្វីដែលខ្លួនមាន និងហ៊ានធ្វើអ្វីដែលខ្លួនចង់បាន ដើម្បីអាចសម្រេចគោលដៅក្លាយជាបុគ្គលមានតម្លៃសម្រាប់សង្គមជាតិ និងភពផែនដីមួយនេះ។
អំពីអ្នកនិពន្ធ
សួស្តី! ខ្ញុំបាទឈ្មោះ ធឿន សុធា កើតនៅឆ្នាំ១៩៨៥ ជាកូនទី២ ក្នុងចំណោមបងប្អូន ៦នាក់ (ប្រុស៣ ស្រី៣)។ ឪពុកឈ្មោះ ភួង ធឿន មានមុខរបរធ្វើជាងសំណង់ និងម្តាយឈ្មោះ ថៃ យ៉េង មានមុខរបរធ្វើស្រែ។ ខ្ញុំបានចាប់កំណើតនៅក្នុងគ្រួសារកសិករមួយ ដែលមានទីលំនៅ នៅភូមិថ្មី ឃុំរុងរឿង ស្រុកថ្ពង ខេត្តកំពង់ស្ពី។
ខ្ញុំបានប្រឡងបញ្ចប់ថ្នាក់មធ្យមសិក្សាទុតិយភូមិ (បាក់ឌុប) នៅឆ្នាំ២០០៦ នៅ វិទ្យាល័យឧដុង្គ ហើយបញ្ចប់បរិញ្ញាបត្រ ជំនាញវិទ្យាសាស្រ្តកុំព្យូទ័រ នៅឆ្នាំ២០១០ នៅសាកលវិទ្យាល័យភ្នំពេញអន្តរជាតិ។
ខ្ញុំទទួលបានឱកាសការងារជាលើកដំបូង នៅឆ្នាំ២០០៨ ដោយត្រូវបម្រើការងារនៅក្រុមហ៊ុនឯកជនមួយ។ ពីព្រោះតែការខិតខំប្រឹងប្រែងបំពេញការងារអស់រយៈពេលជាង ១២ឆ្នាំ ខ្ញុំក៏ត្រូវក្រុមហ៊ុនដំឡើងតួនាទី ជាបន្តបន្ទាប់ គឺតាំងនៅជាមន្រី្តកម្រិតទាប រហូតក្លាយជាប្រធាននាយកដ្ឋាន រួចមកខ្ញុំបានបញ្ចប់អាជីពជាអ្នកធ្វើការនៅដើមឆ្នាំ២០២០។
ដោយយោងលើបទពិសោធការងារ ចំណេះជំនាញ ហើយចង់ដើរតាមក្តីស្រមៃ ឬគោលដៅជីវិតរបស់ខ្លួនឯងផង។ ម្យ៉ាងអាចដោះស្រាយបញ្ហាមនុស្សទូទៅបានច្រើន ខ្ញុំក៏បានចាប់ផ្តើមបង្កើតក្រុមហ៊ុន គឺនៅដើមឆ្នាំ២០២០ ដែលមានឈ្មោះថា នទីភូមី សឹលូសិន ឯ.ក (នទី) ជាកន្លែងផ្ទុកព័ត៌មានពីឱកាសការងារថ្មីៗ បេក្ខជន និងវីដេអូអប់រំអូល្អៗ ជាមួយប្រព័ន្ធគ្រប់គ្រងដ៏ទំនើបឈានមុខគេ។
មកដល់បច្ចុប្បន្ននេះ ខ្ញុំជាសហស្ថាបនិក និងជានាយកផ្នែកបច្ចេកវិទ្យាព័ត៌មានវិទ្យា នៅ នទីភូមី សឹលូសិន ឯ.ក (នទី)។ ខ្ញុំក៏ជាអ្នកនិពន្ធម្នាក់ផងដែរ ប្រចាំនៅ គ្រឹះស្ថានបោះពុម្ពផ្សាយសៀវភៅជីវិត ដែលជាម្ចាស់ស្នាដៃសៀវភៅ «មនុស្សខ្មៅ» បានចេញផ្សាយជាផ្លូវការនៅចុងខែមករា ឆ្នាំ២០២១ ហើយខ្ញុំក៏មានស្នាដៃទី២ ដែលបោះពុម្ពផ្សាយដោយខ្លួនឯង គឺសៀវភៅ «នាងសាខន» ដែលជាប្រលោមលោកមនោសញ្ចេតនា បែបលើកទឹកចិត្ត បានចេញផ្សាយនៅចុងខែកក្កដា ឆ្នាំ២០២១។
ទៅថ្ងៃអនាគត ខ្ញុំមានគោលបំណងចង់ឃើញក្រុមហ៊ុនទទួលបានជោគជ័យ មានកេរ្តិ៍ឈ្មោះល្អ ហើយក៏ជាក្រុមហ៊ុនខ្មែរតែមួយគត់ ដែលប្រើប្រាស់បច្ចេកវិទ្យាចុងក្រោយគេ។ លើសពីនេះ ខ្ញុំមានក្តីស្រមៃធំ ចង់ក្លាយជាអ្នកនិពន្ធល្បីឈ្មោះមួយរូប ចង់ធ្វើជាអ្នកចែករំលែកចំណេះដឹង ផ្តល់ជាផ្នត់គំនិតវិជ្ជមាន និងបទពិសោធជីវិតដល់ក្មេងៗជំនាន់ក្រោយ អ្នកទន់ខ្សោយ ឬអ្នកដែលគ្មានឱកាសជាដើម៕
