សេចក្តីសុខនិងភាពជោគជ័យស្ថិតនៅក្នុងដៃអ្នកហើយ! ច្រើនដងក្នុងជីវិតនៃការធ្វើការងាររបស់ខ្ញុំកន្លងមក ក្នុងនាមជាអ្នកនិពន្ធ អ្នករៀបរៀង អ្នកគិត អ្នកសរសេរបានវិលវល់តែជាមួយនឹងឯកសារ និងការសិក្សាពីបុគ្គលល្បីៗ ដែលទទួលបានជោគជ័យក្នុងជីវិត។
មានរឿងមួយដែលខ្ញុំបានឃើញជានិច្ចប្រៀបបីដូចជាអណ្តាត ភ្លើងដែលគ្មានថ្ងៃរលត់របស់អ្នកទាំងនោះ គឺការជឿជាក់យ៉ាងមោះមុតរបស់ពួកគេ។ ពួកគេជឿជាក់អស់ពីចិត្តថានៅក្នុងលោកនេះ គេធ្វើបានគ្រប់យ៉ាងព្រោះគេជឿថា គេធ្វើបាន ទើបគេទទួលជោគជ័យបានយ៉ាងធំធេងដូច្នេះ។
បន្ទាប់ពីនោះមក ខ្ញុំក៏ខំព្យាយាមរកចម្លើយ និងបច្ចេកទេសល្អៗ ដែលមនុស្សយើងគួរតែយកវាមកប្រើក្នុងការរស់នៅ និងការធ្វើការងារឲ្យកាន់តែបានផលល្អឡើង ហើយចម្លើយទាំងអស់នេះវាស្ថិតនៅក្នុងសៀវភៅមួយក្បាលនេះហើយ។ ខ្ញុំបាទសង្ឃឹមថា ខ្ញុំអាចមានចំណែកជួយឱ្យអ្នកគ្រប់គ្នាក្រោកឡើង មកធ្វើអ្វីគ្រប់យ៉ាងឱ្យបានសម្រេចដោយដៃរបស់អ្នកផ្ទាល់។ សូមជឿចុះថា អ្នកប្រាកដជាអាចធ្វើបាន។
