តាមពិតទៅ យើងត្រូវយល់អំពីរបៀបចាត់ចែងនយោបាយដើម្បីឱ្យដឹងថា អ្វីទៅជានយោបាយ? នយោបាយជាអ្វីមួយដែលនាំប្រជាពលរដ្ឋក៏ដូចជាប្រជាជាតិទាំងមូល មានភាពរីកចម្រើន មានសុខសន្តិភាព ដូចមានពាក្យថានយោបាយទឹក នយោបាយពង្រីកទីក្រុង…។ ទាំងនេះកើតចេញពីអ្នកនយោបាយ ហើយអ្នកនយោបាយកើតចេញពីពលរដ្ឋជាអ្នកជ្រើសតាំង ស្របតាមរដ្ឋធម្មនុញ្ញជាច្បាប់កំពូលរបស់ប្រទេស ដើម្បីឱ្យដឹកនាំទៅរកការអភិវឌ្ឍគ្រប់វិស័យ។ ដូច្នេះកត្តានយោបាយជារឿងល្អ ប៉ុន្តែដោយសារអ្នកនយោបាយមួយចំនួនបានដើរខុសពីគោលការណ៍នយោបាយពិតប្រាកដ ទើបធ្វើឱ្យប្រទេសជាតិទាំងមូលជួបនូវមហន្តរាយយ៉ាងធំធេង ដូចយ៉ាងសម័យទសវត្សរ៍ទី៧០ជាដើម។ បញ្ហានេះធ្វើឱ្យពលរដ្ឋខ្មែរភាគច្រើនដក់ជាប់នូវគំនិតភ័យខ្លាច ដោយសារការឆ្លងកាត់ការដឹកនាំនយោបាយខុសកន្លងមក ពេលបានឮពាក្យនយោបាយភ្លាម ភ័យខ្លាចរហូតមានឪពុកម្ដាយមួយចំនួន ហាមឃាត់កូនចៅមិនឱ្យលូកលាន់ចូលក្នុងរឿងនយោបាយ។ ប៉ុន្តែបើយើងព្យាយាមស្វែងយល់រឿងនយោបាយឱ្យបានច្បាស់លាស់ នោះយើងនឹងលែងភ័យខ្លាច ហើយលែងចាញ់បោកបុគ្គលទុច្ចរិតមួយចំនួន ដែលតាំងខ្លួនជាអ្នកនយោបាយទៀត ជាពិសេសវាកាន់តែធ្វើឱ្យយើងម្នាក់ៗមានភាពរឹងប៉ឹងខ្លាំងឡើង។
ហេតុនេះសៀវភៅដែលលោកអ្នកកាន់នៅក្នុងដៃនេះ បានរៀបរាប់យ៉ាងច្បាស់អំពីទម្រង់នយោបាយនៅស្រុកខ្មែរ នាទសវត្សរ៍ ទី៦០ គ្រាន់ជាប្រទីបសម្រាប់បំភ្លឺដល់ជនដែលប្រាថ្នាយល់ដឹងពីទម្រង់នយោបាយនៅជំនាន់នោះ ដើម្បីរៀនសូត្រយកចំណេះដឹងបន្ថែម។ ម្យ៉ាងទៀត ការរៀបចងក្រងបោះពុម្ពស្នាដៃនេះឡើង ក្នុងគោលបំណងចង់រក្សាទុកនូវកេរដំណែលចាស់ សម្រាប់កុលបុត្រ-ធីតាជំនាន់ក្រោយសិក្សាបន្ត។ ព្រោះថាវាជាព្រឹត្តិការណ៍នយោបាយដែលរំលេចចេញពីប្រវត្តិពិតនៃសម័យនីមួយៗ មិនមែនជាការស្រមៃរបស់អ្នកនិពន្ធណាមួយឡើយ។
