ការគិតផ្លាស់ជីវិតថ្មី

ជីវិតដែលតែងតែជួបតែបញ្ហាជាជីវិតដែលរស់ដូចជាផ្កាប្រឹងរីកនៅក្រោមកម្ដៅថ្ងៃក្ដៅដែលមិនមានទីម្លប់រហូតដល់អស្ដង្គត។ ហើយផ្កាដែលខ្វះនូវទឹកជាអាហារគឺកាន់តែពិបាកក្នុងការបន្តជីវិតនិងពង្រីកសម្រស់អួសសត្វឃ្មុំ និងកន្លង់ទាំងឡាយ។
សៀវភៅ “ការគិតផ្លាស់ជីវិតថ្មី” នេះ យើងចាត់ទុកថាជាសៀវភៅកំណត់ហេតុជីវិតប្រចាំថ្ងៃ និងជាសៀវភៅប្រឹក្សាសកម្មភាពនិងការគិតផងដែរ។ ក្នុងសៀវភៅមួយក្បាលនេះមានអត្ថបទសរុប៤៥ ដែលបណ្ដុំដោយសកម្មភាពដែលអ្នកធ្លាប់ជួបស្ទើតែជារៀងរាល់ថ្ងៃ និងបញ្ហាដែលជួបហើយត្រូវដោះស្រាយ និងមានទស្សនៈ សារជាគតិសម្រាប់ការគិតសារជាថ្មីផងដែរ។
ជីវិតពិតជាពិបាកបន្តិចហើយ បើខ្វះអ្នកកាន់ដៃនិងនៅក្បែរចាំផ្ដល់កម្លាំងចិត្ត។ មនុស្សយើងជាច្រើនបានកំពុងភ្លេចថាខ្លួនឯងជានរណា ធ្វើអ្វី ចង់បានអ្វី ហើយបន្តទៅនឹងទៅទីណា! ដែលមួយថ្ងៃៗយកសកម្មភាពខ្លួនឯងទៅផ្ញើជាមួយអ្នកដទៃ គិតអំពីអ្នកដទៃ សរសើរអ្នកដទៃ ទាំងដែលខ្លួនឯងនៅតែពិបាកឬមើលគេហើយមកបន្ទាបតម្លៃខ្លួនឯងស្ទើតែស្មើសូន្យ ហើយតាំងយំស្រែកថា ហេតុអ្វីពិភពលោកនេះអយុត្តិធម៌សម្រាប់រូបខ្លួនឯងម៉្លេះ! ចូរយកអារម្មណ៍របស់អ្នកដាក់ក្នុងសៀវភៅនេះ អ្នកនឹងអាចមើលឃើញថាខ្លួនមានកំហុសហើយត្រូវរំដោះខ្លួនចេញពីបន្ទប់ងងឹត ទៅរកបន្ទប់មានពន្លឺមួយទៀតដោយរបៀបណា។
ទុក្ខលំបាក រឿងសៅហ្មងទាំងឡាយទុកជាមួយឡែកសិនចុះ ហើយចាប់យករឿងសប្បាយរីករាយ មកក្នុងខ្លួនអ្នកទើបការរស់នៅក្នុងថ្ងៃនេះពេញលេញ និងមានភាពស្រស់បំព្រងបាន។ អតីតកាលខ្លះអាចគ្រវែងចោលបានបោះវាចោលទៅ ឈប់គិតបានឈប់គិតទៅ រឿងអនាគតបើវាស្មុគស្មាញពេកកុំគិតពីវាពេកអី ចូររស់នៅថ្ងៃនេះឱ្យ ប្រសើរ និងមានថាមពលសិនទើបថ្ងៃស្អែកយើងមានកម្លាំងបន្តដំណើរទៅមុខ។