«ក្តាប់ឱកាស» គឺជាគន្លឹះចាប់ផ្តើមក្នុងការជំរុញខ្លួនយើងឱ្យបោះជំហានទៅមុខ ទោះបីកំពុងស្ថិតក្នុងស្ថានភាពមិនល្អក៏ដោយ។ យើងត្រូវជឿជាក់ខ្លួនឯង ពិសេសត្រូវជឿថាយើងអាចធ្វើបាន។ រឿងមួយដែលយើងត្រូវចាំក្នុងចិត្ត គឺគ្មានការចាប់ផ្តើមណាមួយ ចាំបាច់ត្រូវតែចាប់ផ្តើមពេលមានអ្វីៗគ្រប់យ៉ាងនោះទេ។ បើយល់ថាជាឱកាស យើងត្រូវតែចាប់ក្តាប់ឱ្យជាប់ ហើយប្រើឱ្យវាឆ្លើយតបនឹងទឹកចិត្ត ដែលចង់ជោគជ័យ។ ជីវិតនឹងជោគជ័យ បើចេះចាប់និងប្រើឱកាស។ សៀវភៅនេះនឹងផ្តល់ជូននូវ៖
១. ទ្រឹស្តី និង បទពិសោធសម្រាប់ការចាប់ផ្តើម។ លោកអ្នកត្រូវសិក្សាទ្រឹស្តី វិភាគ ពិចារណា ច្នៃ និង ប្រើឱ្យចំគោលដៅ ពិសេសធ្វើជាគ្រឹះសម្រាប់អភិវឌ្ឍខ្លួន ដើម្បីមុខរបរ ការងារ គ្រួសារ និង សង្គម។
២. ដំណើរការ និង វិធីសាស្ត្រដែលអាចជួយលោកអ្នកឱ្យស្រមៃឃើញហេតុការណ៍ និងបទពិសោធជាក់ស្តែង។ លោកអ្នកអាចចាប់ផ្តើមពីចំណុចនឹកឃើញដែលច្នៃចេញពីដំណើរការដែលបង្ហាញនៅក្នុងសៀវភៅនេះ។
៣. ចំណុចជួយឱ្យរៀនពីបុគ្គលជោគជ័យ។ ទោះបីគិតខ្លួនឯងមិនចេញ ក៏វាមិនមែនជាចុងបញ្ចប់នៃដំណើរការជីវិតដែរ ព្រោះនៅតែអាចច្នៃគំនិតពីអ្នកដទៃបាន។
