ហេតុអ្វីទើបយើងចូលចិត្តចម្លងតាមទំនិញដែលមានម៉ាកល្បីៗ ពី ទូទាំងពិភពលោកបានយ៉ាងពូកែ រហ័ស និងដូចគ្នាច្រើនជាងគិតច្នៃប្រឌិតដោយខ្លួនឯង?
…ហេតុអ្វីបានជារដ្ឋាភិបាល និងយុគសម័យជាច្រើន ច្រើនតែប្រើវិធីដោះស្រាយបញ្ហានិងអភិវឌ្ឍប្រទេសដោយវិធី «ចម្លង» ពីប្រទេសដែលអភិវឌ្ឍច្រើនជាងការប្រមូលគំនិតពិចារណារកវិធីដោះស្រាយបញ្ហា ឱ្យសមនឹងបរិបទសង្គមរបស់ខ្លួនយ៉ាងពិតប្រាកដទៅវិញ?
ចម្លើយដែលល្មមនឹងអាចនឹកឃើញ នោះគឺគ្រាប់ពូជនៃគំនិតច្នៃប្រឌិតមិនបានជំរុញឱ្យអភិវឌ្ឍហ្នឹងឯង។
ប្រសិនបើចង់ប្រៀបធៀបគំនិតច្នៃប្រឌិតរបស់មនុស្សនៅក្នុងសង្គមយើងដូចជាគ្រាប់ពូជ គឺត្រូវប្រៀបធៀបគ្រាប់ពូជដែលដាក់នៅក្នុងកំប៉ុងទុកចោលដែលកសិករមិនបានយកទៅសាបព្រោះ ដោយសារតែរដ្ឋមិនមានគោលនយោបាយឱ្យកសិករដាំ និងបណ្តុះគំនិតច្នៃប្រឌិត ហើយបុព្វបុរសបានបង្រៀនឱ្យដាំគ្រាប់ពូជខាងគំនិតប្រភេទដូចដែលធ្លាប់ដាំមក ឯបរិបទនៅក្នុងសង្គមក៏ដូចគ្នាដែរ គ្មាននរណាមួយអាចឆ្លុះបង្ហាញតម្រូវការផលិតផលពីគំនិតច្នៃប្រឌិតបានទេ។ ដូច្នេះហើយ ទើបសង្គមរបស់យើងគឺជាសង្គមហាក់ដូចជាខ្វះគំនិតច្នៃប្រឌិត តែតាមការពិតជនជាតិយើងមានគំនិតល្អៗ គំនិតថ្មីៗ មិនចាញ់ជាតិសាសន៍ដទៃឡើយ។ គួរឱ្យស្តាយណាស់ជាច្រើនជំនាន់មកហើយ យើងមិនបានទទួលការអភិវឌ្ឍចំពោះរឿងគំនិតច្នៃប្រឌិតនេះសោះ។
គំនិតច្នៃប្រឌិតគឺសំខាន់សម្រាប់មនុស្សគ្រប់ៗគ្នា ព្រោះគំនិតច្នៃប្រឌិតជួយឱ្យយើងអាចដោះស្រាយបញ្ហាចាស់ដោយវិធីថ្មី ជួយឱ្យយើងមើលឃើញឱកាសថ្មីៗ រកភាពដែលអាចទៅរួចថ្មីៗ ធ្វើឱ្យយើងបាននូវអ្វីដែលថ្មីៗ ជួយឱ្យយើងគិតបានយ៉ាងសមរម្យ។ ក្នុងរឿងនោះនៅពេលដែលគិត នឹងជួយបន្ថែមឱកាសនៃភាពជោគជ័យក្នុងការដោះស្រាយបញ្ហា និងជួយជម្រុះចោលនូវការប្រកាន់ខ្ជាប់នូវលក្ខណៈចាស់ៗ ដែលមិនបានជួយឱ្យយើងរីកចម្រើន។
គំនិតច្នៃប្រឌិតមិនមែនជាទេពកោសល្យនោះទេ តែវាស្ថិតនៅលើការសិក្សា ជំនាញ និងការហ្វឹកហាត់ទេតើ។ ប្រសិនបើយើងអភិវឌ្ឍសក្តា-នុពលរបស់ខួរក្បាលនៅក្នុងផ្នែកនៃ «គំនិតច្នៃប្រឌិត» ឱ្យមានប្រសិទ្ធភាព នោះយើងនឹងឃើញថា គ្រប់បញ្ហាទាំងអស់នឹងមាននូវចម្លើយល្អៗ ដែលអាចយកមកបដិបត្តិបានយ៉ាងសមរម្យ។
ការគិតច្នៃប្រឌិត គឺជាការគិតមួយបែបទៀត ដែលមនុស្សគ្រប់លំដាប់នៅក្នុងសង្គមគួរតែដឹងពីវិធីគិត និងជាសៀវភៅមួយបែបការគិតក្នុងចំណោមសៀវភៅឈុត «គំនិតឈ្នះទាំង ១០» ដែលខ្ញុំបានលើកឡើងពីវិធីគិតទាំង ១០ ដើម្បីជួយអភិវឌ្ឍឱ្យមនុស្សនៅក្នុងសង្គមបាន «ចេះគិត» ព្រោះសៀវភៅការគិតបែបច្នៃប្រឌិតមួយក្បាលនេះមានបំណងឱ្យមិត្តអ្នកអានអាចអភិវឌ្ឍខ្លួនឯងឱ្យក្លាយជា «អ្នកគិតច្នៃប្រឌិត» បានចាប់ផ្តើមពីការត្រួតពិនិត្យស្ថាន-ភាពនៃការគិតរបស់ខ្លួន ការផ្លាស់ប្តូរទស្សនៈ និងលក្ខណៈពិសេសឱ្យមានផលចំពោះការគិតច្នៃប្រឌិត ព្រមទាំងសិក្សាពីវិធីគិតច្នៃប្រឌិតដែលអាចយកទៅប្រើក្នុងការបដិបត្តិពិតនៅក្នុងជីវិតប្រចាំថ្ងៃបាន។
ការអភិវឌ្ឍសក្តានុពលនៃការគិតច្នៃប្រឌិត រួមជាមួយនឹងការគិតក្នុងទស្សនៈផ្សេងៗនឹងជួយអភិវឌ្ឍសតិបញ្ញារបស់យើងឱ្យក្លាយទៅជាមនុស្សដែលឈ្លាសវៃ ដោះស្រាយបញ្ហា និងអភិវឌ្ឍនូវអ្វីដែលថ្មីៗបាន ដែលធ្វើឱ្យយើងអាចធ្វើជាអ្នកឈ្នះក្នុងការប្រឈមមុខនឹងអនាគត ដែលផ្លាស់ប្តូរទៅបាន។
